சன் பிக்சர்சின் அனுமதியோடு வெளிவரும் தந்திரன்

எந்திரன் படத்தை எத்தனை கோடியில் எடுத்திருப்பார்கள்? சன் பிக்சர்ஸ் ஒரு கணக்கு சொன்னாலும், திரைப்பட துறை அனுபவசாலிகள் வேறு கணக்கு போட்டுக் கொண்டிருக்கிறார்கள். எப்படியிருந்தாலும் அதன் பட்ஜெட் 60 கோடிக்கும் மேல்தான். அதே கதையை மூன்று கோடியில் ஒருவர் எடுத்தால் சிரிப்பீர்கள்தானே? சிரிப்பதற்காகதான் இந்த படத்தை எடுக்கிறார்களாம். அது எந்திரன் என்றால் இது தந்திரன்.

இதற்கு முன்பு என்னம்மா கண்ணு, கோவை பிரதர்ஸ், இங்கிலீஷ்காரன் அது இது என்று ஏழெட்டு படங்கள் எடுத்திருக்கிறார் ஷக்தி சிதம்பரம். ஆனால் இவர் உலக தமிழகர்கள் மத்தியில் முழுமையாக அறியப்பட்டது சமீபத்தில்தான். விஜய்யின் காவலன் படத்தை முதல் பிரதி அடிப்படையில் வாங்கி வெளியிடுகிறேன் என்று களத்தில் குதித்தாரே, அப்போதுதான். சன் பிக்சர்ஸ், ரெட் ஜெயன்ட், ஏஜிஎஸ் என்று கோடிகளை சர்வசாதாரணமாக கையாளுகிற தயாரிப்பாளர்கள்தான் விஜய் படத்தை வாங்கி வெளியிடுவது பற்றியெல்லாம் கனவு காண முடியும். ஆனால் கோடம்பாக்கத்தில் முந்தைய படங்களால் பெரும் நஷ்டத்திற்குள்ளாகி பைனான்சியர்களை கண்டாலே ஓடிக் கொண்டிருக்கும் ஒரு நபர் எப்படி காவலன் படத்தை வாங்க முடிந்தது என்றெல்லாம் பொறாமை கண்கள் ஷக்தி சிதம்பரத்தை சுற்றி சுற்றி தாக்கின.

அதன் விளைவாகவோ என்னவோ, இந்த படம் வெளியாகும் போது ஷக்தி சிதம்பரத்தின் பெயரோ, அவரது கம்பெனியின் பெயரோ அதில் இடம் பெறவில்லை. அந்தளவுக்கு பிரச்சனை வந்து சூழ்ந்து கொண்டது ரிலீஸ் தினத்தன்று.

இவர் தயாரிக்கப் போகும் இந்த புதிய படத்திற்குதான் தந்திரன் என்று பெயர் வைத்திருக்கிறார். இதில் இவரே விஞ்ஞானியாக நடிக்கப் போகிறாராம். இவரது ஃபேவரைட் ஹீரோயின் நமீதாவுக்கு ஐஸ்வர்யாவின் கேரக்டர். அதுமட்டுமல்ல, இவர்களை தவிர முக்கிய கேரக்டரில் சந்தானமும் நடிக்கிறார். ஸ்பூஃப் வகை படம்தான் இது என்றாலும், சன் பிக்சர்சின் அனுமதியை பெற்றுதான் இந்த படத்தை தயாரிக்கப் போகிறாராம் ஷக்தி சிதம்பரம்.