வீடு தேடி போன விஷால் ...

இப்போதெல்லாம் ரொம்ப பக்குவமாகவே எல்லாவற்றையும் அணுகி வருகிறார் விஷால். இல்லையென்றால் சில வாய்ப்புகளை தேடிப் போய் ஏற்றுக் கொள்வாரா? பூபதி பாண்டியன் இயக்கத்தில் ஒரு படத்தில் நடிக்கவிருக்கிறார் விஷால். பிரபுதேவா இயக்கத்தில் ஒரு படத்தில் நடித்துக் கொண்டிருக்கிறார். ஒரு ஷெட்யூல் படப்பிடிப்பு முடிந்து அடுத்த ஷெட்யூலுக்காக காத்திருக்கிறார். இடையில் ஒருவர் வேறொருவரிடம் சொன்ன கதையை, தன்னிடம் யாரோ சொல்லக் கேட்டு அசந்து போனாராம். அவரை நானே போய் பார்க்கிறேன் என்று அவர் வீட்டுக்கே போய்விட்டார் விஷால்.

விஷாலின் வருகை அந்த டைரக்டரையே அதிர்ச்சிக்குள்ளாக்கிவிட்டதாம். சொல்லியிருந்தா நானே வந்திருப்பேனே என்று இவர் வழிய, உங்க கதையை வேற ஒருத்தர் சொல்லி கேட்டேன். முழுசா கேட்கலாம்னு வந்தேன் என்று இவர் புகழ, அங்கேயே உட்கார்ந்து ஒரு புதுப் படத்தை துவங்கிவிட்டார்கள் இருவரும்.

தனது தற்போதைய படங்களை முடித்துவிட்டு இந்த படத்தை ஆரம்பிக்கலாம் என்று சொல்லிவிட்டு வந்தாராம் விஷால். இவர் தேடிப்போன அந்த இயக்குனர், விஜய்யை நடிக்க வைத்து சச்சின் என்ற படத்தை இயக்கிய ஜான் மகேந்திரன்! ஒருகாலத்தில் தமிழ்சினிமாவை தலை நிமிர வைத்த டைரக்டர் மகேந்திரனின் மகன்தான் இவர்.

சரியான இடத்தைதான் தேடிப் போயிருக்கிறார் விஷால்.