ஆந்திர மாநிலம் புட்டபர்த்தியில் இருக்கும் ஆசிரமத்தில் ஆன்மீக குரு சத்ய சாய்பாபா வாழ்ந்தார். அவர் ஆன்மீக பணிகள் மட்டும் இன்றி, சமூக பணிகளிலும் ஈடுபட்டார். தனது ஆசிரமத்தையொட்டி அவர் மிகப்பெரிய ஆஸ்பத்திரி ஒன்றையும் அவர் நடத்தி வந்தார்.
உடல் நலக்குறைவால் அவர் கடந்த ஏப்ரல் மாதம் தனது 86-வது வயதில் மறைந்தார். அதன்பின் கடந்த ஜுன் மாதம் 16-ந் தேதி, அவர் பயன்படுத்தி வந்த அறைகளை ஆசிரம நிர்வாகிகள் திறந்து பார்த்தனர்.
இதில் ரூ. 11.57 கோடி ரொக்கமும், 98 கிலோ தங்கமும், 307 கிலோ வெள்ளியும் இருந்தது. பின்னர் 2-வது முறையாக ஜுலை 2-ந் தேதி மேலும் ஒரு அறையை திறந்து பார்த்த போது ரூ.76 லட்சம் மதிப்புள்ள தங்கமும், வெள்ளி ஆபரணங்களும் சிக்கின.
இந்த நிலையில் நேற்று முன்தினம் கலெக்டர் துர்கா தாஸ் முன்னிலையில் சாய்பாபாவின் ஆசிரமத்தில் இதுவரை பூட்டி வைக்கப்பட்டு இருந்த "பூர்ண சந்திரா'' என்ற கட்டிடத்தில் சில அறைகளை திறந்து பார்த்தனர்.
அப்போது ராமர் சிலை உள்பட ரூ.34.5 கிலோ தங்கம் மற்றும் 340 கிலோ வெள்ளி ஆபரணங்கள், பாத்திரங்கள் கண்டு பிடிக்கப்பட்டன. ரூ.1 கோடியே 90 லட்சத்து 53 ஆயிரத்து 899 ரொக்கமும் சிக்கியது. தங்க தட்டுகளும், தங்க டம்ளர்களும், தங்க கரண்டிகளும் கிடைத்தன. நேற்று 2-ம் நாளாக மேலும் சில அறைகள் திறக்கப்பட்டன.
அவற்றில் இருந்து 1.5 கிலோ தங்கம், ரூ.32 லட்சம் ரொக்கம், 734 கிலோ வெள்ளி பாத்திரங்கள், வெள்ளி சிம்மாசனம், வெள்ளி பாதுகைகள், சாய்பாபாவின் 3 அடி உயர வெள்ளி சிலை கண்டு பிடிக்கப்பட்டன.
கடந்த 2 நாட்களாக 36 கிலோ தங்கம், 1,074 கிலோ வெள்ளி, ரூ.2.22 கோடி ரொக்கம் கண்டு பிடிக்கப்பட்டு இருப்பதாக கலெக்டர் துர்கா தாஸ் தெரிவித்தார். "இன்று (20-ந் தேதி) மேலும் 2 அறைகளை திறந்து பார்க்கிறோம்'' என்று கலெக்டர் கூறினார்.
No comments:
Post a Comment