இந்திய கிரிக்கெட் அணி கேப்டன் டோனி விஜய் மல்லையாவின் யூ.பி.குரூப்பின் மெக்டோவல் விளம்பர நிறுவனத்தில் தோன்றுகிறார். அதன் போட்டி நிறுவனமான ராயல் ஸ்டாக் விளம்பரத்தில் ஹர்பஜன்சிங் தோன்றுகிறார்.
இந்த நிலையில் ராயல் ஸ்டாக் விளம்பரத்தில் நடிக்கும் ஹர்பஜன்சிங்கை மெக்டோவல்ஸ் விளம்பரம் கிண்டல் செய்துள்ளதாக குற்றச்சாட்டு எழுந்துள்ளது. விளம்பரத்தில் ஹர்பஜன் சிங்கை அவமதித்ததாக கூறி தொழில் அதிபர் விஜய் மல்லையாவுக்கு அவரது தாயார் அவதார் கபூர் நோட்டீஸ் அனுப்பி உள்ளார்.
இது தொடர்பாக அவரது வக்கீல்கள் கூறும் போது விஜய் மல்லையாவின் நிறுவன விளம்பரம் ஹர்பஜனை மட்டுமல்லாமல் அவரது குடும்பத்தினரையும், சீக்கிய சமுதாயத்தையும் அவமதிப்பது போல் அமைந்துள்ளது. அந்த விளம்பரத்தை 3 நாளில் நிறுத்த வேண்டும். இதற்காக மன்னிப்பு கேட்க வேண்டும் என்று கோரி விஜய் மல்லையாவின் நிறுவனத்துக்கு நோட்டீஸ் அனுப்பி உள்ளார்.
இதனால் டோனிக்கும், ஹர்பஜன்சிங்குக்கும் உள்ள உறவு பாதிக்காது என்றனர். மெக்டோவல்ஸ் விளம்பரத்தில் ஹர்பஜன் சிங் போன்ற ஒருவர் அவரது தந்தையிடம் அடிவாங்குவது போலவும், அப்போது டோனி தோன்றி வசனம் பேசுவது போலவும் காட்சி அமைக்கப்பட்டுள்ளது.
இது குறித்து விஜய் மல்லையாவிடம் கேட்ட போது அவர் கூறியதாவது:-
அந்த விளம்பரத்தில் எந்தவிதமான சர்ச்சையும் இருப்பதாக நினைக்கவில்லை. அந்த விளம்பரத்தில் தனிப்பட்ட முறையில் ஹர்பஜன்சிங்கை அவமதிக்கவில்லை. இரண்டு விளம்பர நிறுவனங்களுக்கு உள்ள போட்டிதான். இது தொடர்பாக வந்த வக்கீல் நோட்டீஸ் தொடர்ந்து எனது வக்கீல்கள் ஆய்வு செய்து வருகிறார்கள்.
இவ்வாறு அவர் கூறினார்.
No comments:
Post a Comment