உள்ளாட்சி தேர்தலில் தி.மு.க. தனித்து போட்டி ஏன்?: கருணாநிதி விளக்கம்

தி.மு.க. தலைவர் கருணாநிதி சென்னையில் நேற்று நிருபர்களுக்கு பேட்டியளித்தார். பேட்டியின்போது நிருபர்கள் கேட்ட கேள்விகளும், அதற்கு அவர் அளித்த பதில்களும் வருமாறு:

கேள்வி: அண்ணா பிறந்தநாளான இன்று கழக தோழர்களுக்கு நீங்கள் தெரிவிக்கும் செய்தி?

பதில்: அண்ணா வாழ்நாள் முழுவதும் கடமை, கண்ணியம், கட்டுப்பாடு என்பதிலே உறுதியாக இருந்தார். ஜனநாயகம் தழைக்க வேண்டும் என்பதில் அக்கறை கொண்டவராக விளங்கினார். ஜனநாயகத்தின் பெயரால் சர்வாதிகாரம் தலையெடுப்பதை அவர் என்றைக்கும் விரும்பியவரல்ல. அண்ணாவின் இந்த எண்ணத்தை எதிரொலிப்பவர்களாக, அவரது தம்பிமார்கள், அதாவது திராவிட முன்னேற்றக் கழகத்தின் செயல்பட வேண்டும், செயல்படுவார்கள் என்ற நம்பிக்கையை அண்ணாவின் நினைவு போற்றும் இந்த நாளில் நான் உறுதிபட கூறுகிறேன்.

கேள்வி: உள்ளாட்சி மன்ற தேர்தல்களில் தனித்து போட்டியிடப்போவதாக அறிவித்திருக்கிறீர்கள். அதற்கு என்ன காரணம்? எப்படி சொல்கிறீர்கள்?

பதில்: தனியாக நிற்க முடியும் என்ற தைரியத்தில் சொல்லியிருக்கிறோம். அதற்கான காரணங்களையெல்லாம் அறிக்கையிலே தெரிவித்திருக்கிறேன்.

கேள்வி: சட்டசபை தேர்தலின்போதே இந்த முடிவினை எடுத்திருக்கலாம் என்று சொல்கிறார்களே?

பதில்: சட்டமன்ற தேர்தலுக்கும், உள்ளாட்சி மன்றத் தேர்தலுக்கும் உள்ள வேறுபாட்டினை அறிக்கையிலே சொல்லியிருக்கிறேன். இது தாமதமாக எடுக்கப்பட்ட முடிவு அல்ல.

கேள்வி: தேசிய அளவில் அந்த அறிக்கை முக்கியமாக பேசப்படுகிறதே?

பதில்: திராவிட முன்னேற்ற கழகத்தை பொறுத்தவரையில் நாடாளுமன்ற தேர்தல், சட்டப்பேரவை தேர்தல் ஆகியவற்றின் கூட்டணியோ தொகுதி உடன்பாடோ மற்ற கட்சிகளோடு கொள்வதில் எந்தவிதமான பின்வாங்கலும் இல்லை. உள்ளாட்சி மன்ற தேர்தல் அரசியல் ரீதியான அடிப்படையில் மக்களை அணுக கூடியவைகள் அல்ல என்ற காரணத்தாலும், பொதுமக்களின் அடிப்படை தேவைகளை முன்வைத்து பணிகள் ஆற்ற வேண்டிய நிலைமைகளாலும், இதில் அரசியலை கலக்க தேவையில்லை என்ற கருத்தின் அடிப்படையிலே தான் திராவிட முன்னேற்றக்கழகம் இந்த முடிவினை அறிவித்திருக்கின்றது.

கேள்வி: உள்ளாட்சி மன்ற தேர்தல்களில் தனித்து போட்டி என்று நீங்கள் அறிவித்திருப்பதால், காங்கிரஸ் கட்சியோடு தற்போதுள்ள உறவு பாதிக்குமா?

பதில்: காங்கிரசோடு உறவு நாடாளுமன்றத் தேர்தல், சட்டமன்றத் தேர்தல் போன்ற நேரங்களில் தான் தேவைப்படும். அப்போதெல்லாம் எங்களுடைய உறவு முறியாது நீடிக்கும். மத்திய அரசோடு நாங்கள் உறவோடு இருக்கிறோம்.

கேள்வி: தனித்து போட்டி என்று நீங்கள் அறிவித்த பிறகு, காங்கிரஸ் கட்சியின் தலைமையிலிருந்து யாராவது உங்களுடன் தொடர்பு கொண்டார்களா?

பதில்: பேசவில்லை. அறிக்கையிலே தெளிவாக சொல்லியிருக்கிறோம். காங்கிரசுடன் உறவு இல்லை என்று நாங்கள் சொல்லவில்லை. உள்ளாட்சி மன்ற தேர்தல்களில் கூட்டணி இல்லை, நாங்கள் தனித்து நிற்கிறோம் என்பது தான் நான் விடுத்துள்ள அறிக்கை.

கேள்வி: கூட்டணியில் சேர வேறு கட்சிகள் அவர்களாக வந்தால் ஏற்றுக்கொள்வீர்களா?

பதில்: உள்ளூர் விவகாரங்களை பொறுத்தவரையில் யாராவது யோசனை சொன்னால் அதை ஏற்றுக் கொள்வோம். அதன்படி நடக்க நாங்கள் அவர்களோடு இணைந்து பாடுபடுவோம்.

கேள்வி: நீங்கள் தற்போது எடுத்துள்ள முடிவின் காரணமாக மக்கள் பெருவாரியான ஆதரவை உங்களுக்கு தந்து வெற்றி பெறச் செய்தால், இந்த முடிவினை அடுத்து சட்டமன்றத் தேர்தலுக்கும் தொடர்வீர்களா?

பதில்: நடந்தால் என்ன செய்வீர்கள் என்று கேட்கக்கூடாது. நடக்கும் போது கேளுங்கள்.

கேள்வி: மத்திய உள்துறை அமைச்சர் கலந்து கொள்ளவிருந்த கூட்டங்களுக்கு வருவதற்கு ஒப்புக் கொண்ட இரண்டு மாவட்ட கலெக்டர் கள் வராமல் மத்திய அமைச்சரை அவமதித்தது குறித்து ஒரு மூத்த தலைவர் என்ற முறையில் என்ன கூறுகிறீர்கள்?

பதில்: ஒரு மூத்த தலைவர் என்ற முறையில், அண்மையில் மத்திய உள்துறை அமைச்சர் சிதம்பரத்துக்கு நேர்ந்த அவமானத்தை யாராலும் பொறுத்துக்கொள்ள முடியாது. மக்களுக்கு ஆற்ற வேண்டிய பணியை தொடருவதற்காகத்தான், அவைகளை பற்றி திட்டமிடுவதற்காகத்தான் கலெக்டர்களோடு அவருடைய நிகழ்ச்சி ஏற்பாடு செய்யப்பட்டிருந்தது. அந்த பணியை நிறைவேற்ற வேண்டிய கலெக்டர்களே அந்த நிகழ்ச்சிகளை புறக்கணிக்கின்ற அளவிற்கு நடந்து கொண்டார்கள் என்பது இங்கேயுள்ள மேலிடத்தின் கட்டாயம் என்பதை உணர்ந்து நான் மிகவும் வருந்துகிறேன்.

கேள்வி: மத்தியிலும், மாநிலத்திலும் தணிக்கை துறை அதிகாரிகளின் அறிக்கைகள் அவ்வப்போது வெளியிடப்படும்போது அதிர்ச்சியூட்டும் தகவல்களை அவர்கள் தெரிவிக்கிறார்களே?

பதில்: ஒவ்வொன்றை பற்றியும் தனித்தனியாக தேவைப்பட்டால் விமர்சிக்க முடியுமே தவிர, பொதுவான கருத்து எதையும் சொல்ல இயலாது. தணிக்கைத்துறை அதிகாரியின் அறிக்கைகள் குறித்து ஆரம்பத்திலிருந்தே சந்தேகமான புள்ளி விவரங்களை காட்டுகிறார்கள். தொடங்கியபோதே எத்தனையோ கோடிகள் என்று கோடிக்கணக்கில் நட்டம் என்று வெளியிட்டார்கள். பிறகு அது யூகிக்கப்பட்ட தொகை என்றார்கள். இப்படி நட்டம் என்பதையே கேள்விக்குறியாக சொல்லியிருக்கிறார்கள்.

கேள்வி: அலைக்கற்றை ஒதுக்கீட்டு பிரச்சினையில் டிராய் தாக்கல் செய்த அறிக்கையிலும், சி.பி.ஐ. தாக்கல் செய்த அறிக்கையிலும் குற்றச்சாட்டிற்கு ஆதாரம் இல்லை என்பது ஊர்ஜிதமாகி விட்டது. அதற்குப்பிறகும் கைது செய்யப்பட்டவர்கள் எல்லாம் தொடர்ந்து சிறையிலே வைக்கப்பட்டுள்ளார்களே?

பதில்: நிருபர்களுடைய மனோநிலையை நானும் பகிர்ந்து கொள்கிறேன்.

கேள்வி: அலைக்கற்றை ஒதுக்கீட்டில் குற்றச்சாட்டு என்ற நிலையில் கனிமொழியை மாதக்கணக்கில் சிறையில் வைத்திருக்கிறார்களே?

பதில்: கனிமொழிக்கும் அலைக்கற்றை ஒதுக்கீட்டிற்கும் எந்தவிதமான சம்பந்தமும் கிடையாது. கனிமொழி கலைஞர் தொலைக்காட்சியில் ஒரு பங்குதாரர் மட்டுமே. பொதுவாக பங்குதாரர்களை எந்தவொரு நிறுவனத்தின் இதுபோன்ற நடவடிக்கைகளில் இணைத்து வழக்கு போடுவது வழக்கம் இல்லை. இதை நம்முடைய வழக்கறிஞர்கள் சி.பி.ஐ. நீதிமன்றத்தில் மிகத்தெளிவாக விளக்கியிருக்கிறார்கள். இருந்தாலும் வழக்கு தொடருகிறது.

கேள்வி: டிராய் நிறுவனம் கொடுத்த அறிக்கையில் அலைக்கற்றை ஒதுக்கீட்டில் நட்டமே கிடையாது, லாபம் என்று சொல்கிறார்களே?

பதில்: அதைத்தான் நானும் கேட்கிறேன்.

கேள்வி: தமிழகத்தில் பலரை கைது செய்துவிட்டு எதற்காக கைது செய்கிறோம் என்பதையே காவல்துறையினர் சொல்வதில்லை. சேலத்தில் சிறையிலே வைக்கிறோம் என்று சொல்லிவிட்டு கோவைக்கு அழைத்து செல்கிறார்கள். இதற்கெல்லாம் என்ன பதில் கூறுகிறீர்கள்?

பதில்: எதிர்க்கட்சிகளை, குறிப்பாக திராவிட முன்னேற்ற கழக தோழர்களை அடக்குமுறை மூலமும், அவதூறு செய்திகளை வெளியிட்டு களங்கப்படுத்துவதின் மூலமும், தனது சர்வாதிகாரத்தை நிலைப்படுத்தி கொள்ள முடியுமென்று ஜெயலலிதா கருதுகிறார். இதுபோன்ற நடவடிக்கைகளால் எந்தவொரு சர்வாதிகார ஆட்சியும் நீடித்ததாக வரலாறே கிடையாது.

இவ்வாறு கருணாநிதி பதில் அளித்தார்.