அரசியலுக்கு வரமாட்டேன் :அன்னா ஹசாரே

‘நான் ஒரு போதும் அரசியலுக்கு வரமாட்டேன், ஊழலுக்கு எதிரான எனது இயக்கம் அரசியல் இயக்கமாக மாறாது’ என்று அன்னா ஹசாரே கூறினார்.

ஊழலை ஒழிக்க ஜன்லோக்பால் மசோதாவை கொண்டு வர வலியுறுத்தி, டெல்லி ராம் லீலா மைதானத்தில் அன்னா ஹசாரே கடந்த மாதம் உண்ணாவிரதம் இருந்தார்.

இந்த மசோதாவை மத்திய அரசு ஏற்றது. மசோதா மீது நாடாளுமன்றத்தில் விவாதம் நடத்தப்பட்டு, நாடாளுமன்ற நிலைக்குழுவின் பரிசீலனைக்கு அனுப்பப்பட்டுள்ளது.

இந்த மசோதாவை நிறைவேற்ற தவறினால் மீண்டும் போராட்டம் நடத்தப்படும் என்று அன்னா அறிவித்துள்ளார்.

தனது சொந்த ஊரான ராலேகன் சித்தியில் அன்னா ஹசாரே நேற்று அளித்த பேட்டி ஒன்றில்,

’’எனது இயக்கம் ஊழலுக்கு எதிரானது. அரசியல் இயக்கம் அல்ல. அரசியலில் நான் ஒரு போதும் ஈடுபட மாட்டேன்.

ஜன் லோக்பால் மசோதாவை ஆதரிக்காத எம்.பி.க்கள் யார் என்று பார்த்து, அவர்களுடைய வீடுகள் முன்பு பஜனை பாடி முற்றுகை போராட்டம் நடத்துவோம். பிரதமர், எம்.பி.க்கள். நீதித்துறை ஆகியவற்றையும் லோக்பால் மசோதா வரம்புக்குள் கொண்டு வர வேண்டும் என்பதே எங்களின் முக்கிய கோரிக்கை.

நாடாளுமன்றன் குளிர்கால கூட்டத்தொடரின் போது இந்த மசோதா கொண்டு வரப்படும் என்று உறுதி அளிக்கப்பட்டுள்ளது. மசோதாவை கொண்டு வரத் தவறினால் மீண்டும் போராட்டம் நடத்தப்படும்’’ என்று கூறினார்.