தனுஷ் இயக்கத்தில் அபிஷேக் பச்சன்

தனுஷ் இயக்கும் இந்தி படத்தில் அபிஷேக் பச்சன் நடிக்கப் போவதாக தகவல் வெளியாகியுள்ளது.

ஐஸ்வர்யாராய்க்கு சமீபத்தில் பெண் குழந்தை பிறந்தது. இதையடுத்து அவருக்கு ரஜினிகாந்த் தொலைபேசி மூலம் வாழ்த்து கூறினார்.

ரஜினி சார்பில் நேரில் சந்தித்து வாழ்த்துவதற்காகவும் படம் இயக்குவது பற்றி பேசவும் தனுஷ் நேற்று முன்தினம் மும்பை சென்றார்.

அமிதாப், அபிஷேக் பச்சன், ஐஸ்வர்யாராயை சந்தித்து வாழ்த்து தெரிவித்தார். பின்னர் நட்சத்திர ஓட்டலில் தங்கினார். அங்கு வந்து சிறிது நேரம் பேசிக் கொண்டிருந்தார் அபிஷேக் பச்சன்.

பின்னர் டாம் குரூஸ் நடித்த “மிஷன் இம்பாசிபிள் கோஸ்ட் புரோட்டோகால்” படத்தின் பிரத்யேக காட்சிக்கு தனுஷை அவர் அழைத்து சென்றார்.

பிறகு தான் இயக்கும் படத்தில் நடிப்பது பற்றி அபிஷேக்கிடம் பேசிய தனுஷ், தான் இயக்க உள்ள கதை பற்றி கூறினார். அதை அபிஷேக் ரசித்து கேட்டார். படத்தில் நடிப்பது பற்றி பேச்சுவார்த்தை நடக்கிறது.

இந்நிலையில் அமிதாப் பச்சன் தனது டுவிட்டர் பக்கத்தில் தனுஷை பாராட்டி உள்ளார்.

அதில் அவர் குறிப்பிட்டுள்ளதாவது: ஒய் திஸ் கொலைவெறிடி பாடல் கேட்டேன். தனுஷுக்கு பாராட்டு, வீட்டுக்கு வந்திருந்த அவரது எளிமையான தோற்றத்தையும், பழகும் தன்மையையும் பார்த்தேன்.

படைப்பாளியாக இருப்பதும், எளிமையாக இருப்பதும் சொல்லிக்கொடுத்து வருவதில்லை, அது பிறப்பிலேயே இருக்கிறது என்று கூறியுள்ளார்.