சசிகலா அதிமுகவில் மீண்டும் சேர்க்கப்படுவரா?

அதிமுக அடிப்படை உறுப்பினர் உள்ளிட்ட அனைத்து பொறுப்புகளில் இருந்தும் சசிகலா நீக்கப்பட்டுள்ளார் என்று அக்கட்சியின் பொதுச்செயலாளரும், முதல் அமைச்சருமான ஜெயலலிதா அறிவித்துள்ளார்.

கடந்த 20 ஆண்டுகளுக்கு மேலாக சசிகலா, ஜெயலலிதாவுக்கு நெருக்கமான தோழியாக இருந்து வந்தார். ஜெயலலிதா எங்கு இருந்தாலும், அங்கு சசிகலா இருப்பார். சசிகலா இல்லாமல், ஜெயலலிதா எந்தவொரு வெளியூர் பயணங்களையும் மேற்கொண்டதில்லை.

அதிமுகவை பொறுத்தவரை சசிகலா தலைமை செயற்குழு உறுப்பினர் மட்டும்தான். அவர் செயற்குழு கூட்டங்கள், பொதுக்குழு கூட்டங்களில் பங்கேற்பார். இதுதவிர முதல் அமைச்சர் ஜெயலலிதா பங்கேற்றும் அனைத்து கூட்டங்களிலும் பார்வையாளராக இருப்பார்.

பொதுவாகவே கட்சி பொறுப்பில் இருந்து நீக்கப்படுபவர்கள், பின்னர் மன்னிப்பு கோரினால், அவர்கள் மீதான நடவடிக்கை விலக்கிக்கொள்ளப்படுவதுண்டு. இப்போது சசிகலா மீதான நடவடிக்கை இதேபோல நீக்கப்பட வாய்ப்பு உள்ளதா என்ற கேள்வி எழுந்துள்ளது.

அரசியல் கட்சிகளில் ஒருவர் மீது நடவடிக்கை எடுக்கிறார்கள் என்றாலோ, அல்லது கட்சியில் இருந்து நீக்கினாலோ, அவர்கள் தங்கள் நடவடிக்கைகளுக்கு வருத்தம் தெரிவித்து, இனிமேல் தவறான நடவடிக்கைகளில் ஈடுபடமாட்டோம் என்று கட்சி தலைமைக்கு அல்லது கட்சி தலைவருக்கு கடிதம் கொடுப்பது உண்டு. இந்த கடிதங்கள் அரசியல் கட்சிகளில் ஏற்றுக்கொள்ளப்படுவதுண்டு.

பல்வேறு கட்சிகளில் இருந்து முக்கிய பொறுப்பில் இருந்தவர்கள் நீக்கப்பட்டு, பின்னர் இணைந்ததற்கான வரலாறு உண்டு. சசிகலா மீது ஏற்கனவே இதுபோன்ற நடவடிக்கை எடுக்கப்பட்டது உண்டு. 1996ல் அதிமுக தேர்தலில் படுதோல்வி அடைந்தது. தோல்விக்கு பிறகு ஜெயலலிதா மீதும், சசிகலா மீதும் பல்வேறு வழக்குகள் தொடுக்கப்பட்டன. அவர்கள் கைதாகி சிறைக்கு சென்றனர். பின்னர் ஜெயலலிதா, சசிகலாவுக்கும் எனக்கும் எந்தவித தொடர்பும் இல்லை என்று அறிக்கை வெளியிட்டார். அதன்பிறகு இருவரும் ஒன்றாக இணைந்து செயல்பட்ட காட்சிகள் அரங்கேறின. இதுபோன்ற செயல்பாடுகள் மீண்டும் தொடரலாம் என்பது அரசியலில் சகஜமான ஒன்றுதான் என்று அரசியல் நோக்கர்கள் கருத்து தெரிவித்துள்ளனர்.