தூத்துக்குடி மேயர் பதவி: பரபர பட்டிமன்றம்

2 லட்சத்து 32 ஆயிரத்து 236 மொத்த வாக்காளர்களை கொண்ட தூத்துக்குடி நகராட்சியில் இருந்து மாநகராட்சியாக தரம் உயர்த்தப்பட்டதில், ஒரு லட்சத்து 16 ஆயிரத்து 573 ஆண் வாக்காளர்கள், ஒரு லட்சத்து 15 ஆயிரத்து 663 பெண் வாக்காளர்களை கொண்டது இந்த மாநகராட்சி.

திமுக சார்பில் பொன்.இனிதா, அதிமுகவில் சசிகலா புஷ்பா, மதிமுகவில் பாத்திமா பாபு, தேமுதிகவில் ராஜேஸ்வரி, காங்கிரசில் சிந்தியா வைலட் லில்லி, புதிய தமிழகம் கட்சியில் ராஜலட்சுமி உள்ளிட்ட அரசியல் கட்சிகளோடு சுயேட்சை என 13 பெண்கள் மேயர் தேர்தல் போட்டியில் உள்ளனர்.

திமுக வேட்பாளர் பொன்.இனிதா, நகரம் அறியப்பட்ட திமுக பாரம்பரியம் கொண்ட காசிராஜன் என்பவரின் மருமகள். சுயமரியாதை கொள்கையில் இருந்து வந்த திமுக குடும்பத்தைச் சார்ந்தவர் பொன்.இனிதா. நகரமே அறியப்பட்ட வேட்பாளர் என்பதோடு, நீண்ட காலமாக தீர்வு காணப்படாத பக்கிள் ஓடை சீரமைப்பு திட்டம் திமுக ஆட்சியில் நிறைவேற்றியதை சுட்டிக்காட்டி பிரச்சாரம் செய்வது இவரது பலம்.

அதிமுகவின் சசிகலா புஷ்பா, ஐஏஎஸ் அகாடமி நடத்தி வருபவர். ஆனாலும், இவர் வெளியூரைச் சேர்ந்தவர் என்கிற பார்வையும் இருக்கிறது. கடந்த 13.10.2011 அன்று பிரச்சாரத்திற்கு வந்த அதிமுக பொதுச்செயலாளர் ஜெயலலிதாவை, தூத்துக்குடி வாகை குளம் விமான நிலையத்தில், வேட்பாளர் சசிகலா புஷ்பா, அமைச்சர் சண்முக நாதன், அமைச்சர் செல்லப்பாண்டியன் போன்றவர்கள் ஜெயலலிதாவின் காலில் விழுந்து வரவேற்றனர். ஜெயலலிதாவின் பிரச்சாரம், ஆளும் கட்சி, அதோடு இரட்டை இலையின் வாக்கு வங்கி தனக்கு வெற்றியைக் கொடுக்கும் என்ற நம்பிக்கையில் இருக்கிறார் இலை வேட்பாளர். 

மதிமுகவின் பாத்திமா பாபு தூத்துக்குடியில் உள்ள செயின்மேரிஸ் கல்லூரியின் பேராசியர் பணியில் இருந்து ஓய்வு பெற்றவர். நகரத்தில் போராட்டங்கள், மக்களின் பல்வேறு பிரச்சனைகளில் பங்கேற்று குரல் கொடுத்தவர். வீராங்கணை என்ற சமூக சேவை அமைப்பை நடத்தி வருகிறார். நகரில் மூன்றாவது இடத்தில் இருக்கும் மீனவ சமூகத்தைச் சேர்ந்தவர்.

தேமுதிகவின் ராஜேஸ்வரியின் கணவர் தெற்கு மாவட்ட தேமுதிக செயலாளர். கூட்டணி கட்சியான இடதுசாரிகளின் வாக்கு வங்கிகளை நம்பி களத்தில் இறங்கியுள்ளார்.

காங்கிரஸ் கட்சி வேட்பாளர் சிந்தியா வைலட் லில்லியின் மாமனார், அந்தோணி முத்து மாவட்ட காங்கிரஸ் கட்சியின் துணைத் தலைவர். அரசியலுக்கு புது முகமான இவர். காங்கிரசின் வாக்கு வங்கியையும், இங்கே உள்ள காங்கிரஸ் தலைவர்களின் செல்வாக்கும் தனக்கு கைகொடுக்கும் என்ற அதீத நம்பிக்கையில் உள்ளார். ஆனாலும், தூத்துக்குடி நகரிலோ திமுக அதிமுக மதிமுக முக்கோண போட்டியில் உள்ளது.