கோச்சடையான் ஸ்டன்ட் இயக்குநர் அறிவித்தார் சௌந்தர்யா!

சிவாஜி, எந்திரனைத் தொடர்ந்து ரஜினியின் அடுத்த படமான கோச்சடையானுக்கும் ஸ்டன்ட் இயக்குநராக ஒப்பந்தமாகியுள்ளார் பீட்டர் ஹெயின்.

இந்தத் தகவலை படத்தின் இயக்குநர் சௌந்தர்யா அஸ்வின் நேற்று வெளியிட்டுள்ளார்.

 இத்துடன் தொடர்ந்து ரஜினியின் மூன்று படங்களுக்கு சண்டைப் பயிற்சி இயக்குநராகப் பணியாற்றும் வாய்ப்பினை பீட்டர் ஹெயின் பெற்றுள்ளார்.

முன்பெல்லாம் ரஜினி வருடத்துக்கு மூன்று நான்கு படங்கள் நடித்துக் கொண்டிருந்தபோது இது பெரிய விஷயமில்லை. அப்போதெல்லாம் ஜூடோ ரத்தினம் ரஜினியின் நிரந்தர ஸ்டன்ட் மாஸ்டர்.

ஆனால் இரண்டு ஆண்டுகளுக்கு ஒரு படம் என்று மாறிய பிறகு, ரஜினி படத்தில் வாய்ப்பு கிடைப்பது மிகப்பெரிய அதிர்ஷ்டமாக பார்க்கப்படுவதால், பீட்டர் ஹெயின் மிகுந்த சந்தோஷம் அடைந்துள்ளார்.

நாயகி அனுஷ்கா?

கோச்சடையான் நாயகி யார் என்பதை இன்னும் ரஜினி தரப்பில் அறிவிக்கவில்லை. இயக்குநர் மேற்பார்வை பொறுப்பை ஏற்றுள்ள கே எஸ் ரவிக்குமார், "அனுஷ்காவிடம் பேசிக் கொண்டிருக்கிறோம். இன்னும் முடிவாகவில்லை," என்று கூறியிருந்தார்.

மேலும் இரு நாயகிகளிடமும் கோச்சடையான் குழு பேசி வருவதாகக் கூறப்படுகிறது.