நித்யானந்தா-நடிகை ரஞ்சிதா ஆகியோர் படுக்கை அறையில் இருப்பது போன்ற காட்சிகள் வெளியிடப்பட்டன. இந்த காட்சிகளை ஒளிபரப்பாமல் இருக்க ரூ.60 கோடி கேட்டு மிரட்டியதாக, சன் டி.வி. நிர்வாகி சக்சேனா, அவருடைய கூட்டாளி ஐயப்பன் உள்பட பலர் மீது நித்யானந்தா பீட நிர்வாகிகள் போலீசில் புகார் செய்தனர்.
இந்த வழக்கில் சக்சேனா, ஐயப்பன் ஆகியோரை போலீசார் கைது செய்தனர். அவர்கள் இருவரும் சென்னை சைதாப்பேட்டை பெருநகர 11-வது நீதிமன்றத்தில் மாஜிஸ்திரேட்டு ராம் முன்னிலையில் கடந்த 9-ந் தேதி ஆஜர்படுத்தப்பட்டு சிறையில் அடைக்கப்பட்டனர்.
சக்சேனா மற்றும் ஐயப்பன் தரப்பில் ஜாமீனில் விடுவிக்க கோரி மனு தாக்கல் செய்யப்பட்டது. இந்த மனுக்கள் மீதான விசாரணை மாஜிஸ்திரேட்டு ராம் முன்னிலையில் நடைபெற்றது. அப்போது போலீஸ் தரப்பில் ஆஜரான அரசு வக்கீல் கோபிநாத், இந்த வழக்கில் புலன் விசாரணை நடத்தப்பட வேண்டி இருப்பதால் இருவரையும் ஜாமீனில் விடுவிக்க கூடாது என்று கூறி எதிர்ப்பு தெரிவித்தார்.
அதற்கு எதிர்ப்பு தெரிவித்து சக்சேனா, ஐயப்பன் தரப்பு வக்கீல்கள் வாதிட்டனர். இரு தரப்பு வாதங்களை கேட்ட மாஜிஸ்திரேட்டு ராம், சக்சேனாவிற்கு நிபந்தனை ஜாமீன் வழங்கி உத்தரவிட்டார். வாரந்தோறும் திங்கட்கிழமை விசாரணை அதிகாரி முன் ஆஜராகி கையெழுத்திட வேண்டும் என்ற நிபந்தனையுடன் அவருக்கு ஜாமீன் வழங்கப்பட்டது.
சக்சேனாவின் கூட்டாளி ஐயப்பன் ஜாமீன் மனுவை தள்ளுபடி செய்து மாஜிஸ்திரேட்டு உத்தரவிட்டார்.
No comments:
Post a Comment