'ரா ஒன்னை விட ராணாதான் இப்போ முக்கியம்!'

ஷாரூக்கானின் ரா ஒன் படத்தில் ரஜினி ஒரு காட்சியில் நடிப்பார் என்ற செய்தி காட்டுத் தீ போல பரவி வருகிறது கடந்த சில தினங்களாக.

இந்த செய்தியை ஷாரூக்கான் தரப்பே கூறுவதால், முன்னணிப் பத்திரிகைகள் அனைத்தும் வெளியிட்டு வருகின்றன.

இந்த நிலையில், ரஜினி ரா ஒன்னில் நடிப்பார் என்பது உறுதியான தகவல் இல்லை என ரஜினி தரப்பில் கூறத் தொடங்கியுள்ளனர்.

இது தொடர்பாக நம்மிடம் பேசிய, பெயர் வெளியிட விரும்பாத, ரஜினிக்கு நெருக்கமான ஒருவர் கூறுகையில், "ரஜினியின் வாழ்காகை வரலாற்றை கதையாக எடுக்கப் போவதாக பாலிவுட்டில் செய்தி பரப்பப்பட்ட மாதிரிதான் இந்த ரா ஒன் மேட்டரும்.

ரஜினி இப்போது முழுமையாக குணமடைந்து, தனது ராணா பட வேலைகளுக்காக தன்னை தயார்ப்படுத்தி வருகிறார். படத்தில் நடிப்பதற்கான சிறு ஒத்திகைகளிலும் தன்னை ஈடுபடுத்திக் கொண்டுள்ளார்.

ஆனால் அவர் ரா ஒன்னில் நடிப்பது சாத்தியமற்றது. ரா ஒன்னை விட ராணாதான் இப்போது முக்கியம்," என்றார்.

ரா ஒன் தீபாவளிக்கு வெளியாகிறது. இதில் ரஜினி குறிப்பிட்ட அந்த காட்சியில் நடிக்காவிட்டால், அவரைப் போல ஒருவருக்கு மேக்கப் போட்டு நடிக்க வைத்து காட்சியை முடிக்க திட்டமிட்டுள்ளார்களாம்.

எப்படியோ... பிஸினஸ் முக்கியமாச்சே!