அதிமுக அமைச்சர் சொன்ன கதை : திமுக எம்.எல்.ஏக்கள் ஆவேசம்

தமிழக சட்டசபையில் இன்று ஆதி திராவிடர் நலத்துறை அமைச்சர்  சுப்பிரமணியன் பதிலுரை வழங்கினார்.  அப்போது பேராசையின் விளைவு எப்படிப்பட்டதாக இருக்கும் என்பது குறித்து கதை ஒன்றை கூறினார்.

  ஒரு விவசாயி தான் வசதியோடு வாழ வேண்டும் என்று நினைத்து கடவுளிடம் போய் வரம் கேட்டிருக்கிறான். அந்த கடவுள் ஒரு இரும்பு மண்வெட்டியை கொடுத்து இது விசேஷமானது. இதை பயன்படுத்திக் கொள் என்றான்.

உடனே அந்த விவசாயி தனக்கு சொந்தமான நிலத்திற்கு வந்து அந்த இரும்பு மண்வெட்டியால் வெட்டினான். அவன் வெட்ட வெட்ட அந்த நிலத்தில் இரும்பாக வந்தது. உடனே அதை விற்று கொஞ்சம் வசதியாக வாழ்ந்தான்.

மேலும் வசதியாக வாழ வேண்டும் என்ற ஆசையோடு திரும்ப கடவுளிடம் சென்று வேண்டினான். உடனே கடவுள் அவனுக்கு ஒரு வெள்ளி மண்வெட்டியை கொடுத்தார். அதை வாங்கி வந்து நிலத்தில் வெட்டினான். வெள்ளிக்கட்டிகளாக வந்தது. அதை விற்று மேலும் வசதியோடு வாழ்ந்தான்.

அதிலும் நிறைவடையாமல் அவனுக்கு பேராசை ஏற்பட்டு மறுபடியும் கடவுளிடம் போய் வேண்டினான். கடவுள் அப்போது அவனுக்கு ஒரு தங்க மண்வெட்டியை கொடுத்தார். தங்க மண்வெட்டியை எடுத்து வந்து ஆசையோடு நிலத்திற்கு வந்து மண்ணை வெட்டினான். வெட்ட வெட்ட மண்ணாக வந்தது. மிக ஆழத்திற்கு போய் பார்த்தான். அந்த குவிந்திருந்த மண்ணெல்லாம் அந்த குழிக்குள் விழுந்து அவனை அமுக்கி அதில் இறந்து போனான்.  பேராசையினால் அவனுக்கு இத்தகைய நிலைமை ஏற்பட்டது.

அந்த இரும்பு மண்வெட்டிதான் ஸ்டாலின். வெள்ளி மண்வெட்டிதான் மத்திய அமைச்சர் மு.க.அழகிரி. அந்த தங்க மண்வெட்டிதான் திகார் சிறையில் இருக்கிற கனிமொழி. இவ்வாறு அமைச்சர் கதையை கூறி முடித்ததும் திமுக தரப்பில் தங்கம் தென்னரசு எழுந்து ஆட்சேபனை தெரிவித்தார். உடனே திமுக உறுப்பினர்கள் அனைவரும் எழுந்து இந்த கதையை அவை குறிப்பிலிருந்து நீக்க வேண்டும் என்று குரலெழுப்பினார்கள்.

அதற்கு மறுப்பு தெரிவித்த சபாநாயகர் ஜெயக்குமார், பேராசையின் விளைவு எப்படிப்பட்டதாக இருக்கும் என்பதற்கு உதாரணமாகத்தான் அந்த கதையை அமைச்சர் சொன்னார். அதை நீக்க வேண்டிய அவசியமில்லை என்று கூறினார்.

இதை ஏற்க மறுத்த திமுக உறுப்பினர்கள் நின்று கொண்டே உரத்த குரல் எழுப்பினார்கள். அவர்களுக்கு எதிராக அதிமுக உறுப்பினர்கள் சிலர் எழுந்து நின்று கண்டன குரல் எழுப்பினர். இதனால் அவையில் சிறிது நேரம் கூச்சல்குழப்பம் நிலவியது.

தொடர்ந்து திமுகவினர் இருக்கைகளில் அமராமல் குரல் எழுப்பியவாறே நின்று கொண்டிருந்ததால் அவர்கள் அனைவரையும் வெளியேற்றுமாறு சபாநாயகர் ஜெயக்குமார் உத்தரவிட திமுக உறுப்பினர்கள் அவையிலிருந்து வெளியேறினர்