கள்ளக் காதலனுடன் உல்லாசம்: தாயை வெட்டிக்கொன்ற மகன்

தூத்துக்குடி மாவட்டம் கோவில்பட்டி அருகே உள்ள நாலாட்டின்புத்தூர் சிந்தன் நகரை சேர்ந்தவர் முருகன், கூலித்தொழிலாளி. இவருடைய மனைவி செல்லம்மாள் (வயது 40). இவர்களுக்கு கற்பகம் (23) என்ற மகளும், மகராஜன் (22), மாயாண்டி (16) என்ற 2 மகன்களும் உள்ளனர்.

செல்லம்மாளுக்கு அதே பகுதியை சேர்ந்த சிலருடன் கள்ளத்தொடர்பு இருந்ததாக கூறப்படுகிறது. இதை முருகன் கண்டித்தார். இதனால் ஏற்பட்ட தகராறு காரணமாக செல்லம்மாள் தன் கணவரை பிரிந்து வசித்து வந்தார்.

கற்பகத்துக்கு திருமணமாகி ஆலம்பட்டியில் உள்ள கணவர் வீட்டில் வசித்து வருகிறார். மகாராஜனுக்கும் (22) கடந்த சில நாட்களுக்கு முன்திருமணம் நடந்தது. அவரும் தன் மனைவியுடன் ஆலம்பட்டியில் வாடகைக்கு வீடு எடுத்து தனிக்குடித்தனம் சென்றுவிட்டார்.

வழக்கம்போல் மகாராஜன் தாயை பார்ப்பதற்காக நேற்று முன்தினம் இரவு 10 மணிக்கு நாலாட்டின்புத்தூர் வந்தார். அங்கு வீடு பூட்டிக் கிடந்தது. ஆனால் வீட்டுக்குள் செல்லம்மாள் வேறு ஒரு ஆணுடன் பேசிக்கொண்டு இருந்த சத்தம் கேட்டது.

ஏற்கனவே தாயின் நடத்தை பற்றி அறிந்து இருந்த மகராஜன், தன் கண்முன்பே வேறு ஒரு ஆணுடன் தாய் உல்லாசமாக இருப்பதை பார்த்ததும் ஆத்திரம் அடைந்தார். வீட்டின் மேலே ஏறிச் சென்று மேற்கூரையை பிரித்து உள்ளே குதித்தார்.

அப்போது வீட்டுக்குள் செல்லம்மாளுடன் உல்லாசமாக இருந்தவர், மகாராஜனை பார்த்ததும் கதவை திறந்து கொண்டு தப்பி ஓடிவிட்டார். திகைப்பில் இருந்த செல்லம்மாளை மகாராஜன் கண்டித்தார். அப்போது தாய்க்கும், மகனுக்கும் இடையே கடுமையான வாக்குவாதம் ஏற்பட்டது. இதில் மேலும் ஆத்திரம் அடைந்த மகாராஜன் வீட்டில் இருந்த அரிவாளை எடுத்து செல்லம்மாளின் கழுத்தில் சரமாரியாக வெட்டினார்.

இதில் தலை துண்டாகி தரையில் சரிந்து விழுந்த செல்லம்மாள், சம்பவ இடத்திலேயே ரத்தவெள்ளத்தில் துடி துடித்து இறந்தார்.

பின்னர் வெளியே வந்த மகாராஜன், பக்கத்து வீட்டில் குடியிருக்கும் தன்னுடைய உறவினரிடம், என்னுடைய தாயின் நடத்தை பிடிக்காததால் அரிவாளால் வெட்டி கொன்று விட்டேன் என்று கூறிவிட்டு சென்று விட்டார்.

இதைக்கேட்டு அதிர்ச்சி அடைந்த அவர், ஆலம்பட்டியில் உள்ள செல்லம்மாளின் மகள் கற்பகத்துக்கு தகவல் தெரிவித்தார். உடனடியாக பதறியடித்து தாய் வீட்டுக்கு வந்த கற்பகம், அங்கு தன்னுடைய தாய் ரத்த வெள்ளத்தில் பிணமாக கிடந்ததை கண்டு கதறி அழுதார்.

பின்னர் இந்த சம்பவம் பற்றி நாலாட்டின்புத்தூர் போலீசில் கற்பகம் புகார் செய்தார். அதன்பேரில் இன்ஸ்பெக்டர் சங்கர், சப் இன்ஸ்பெக்டர் பாண்டி முத்துலட்சுமி மற்றும் போலீசார் விரைந்து வந்து பிணத்தை கைப்பற்றி பரிசோதனைக்காக கோவில்பட்டி அரசு ஆஸ்பத்திரிக்கு அனுப்பி வைத்தனர்.

மேலும் இந்த கொலை தொடர்பாக நாலாட்டின்புத்தூர் போலீசார் வழக்குப்பதிவு செய்து மகாராஜனை கைது செய்தனர்.