அடுத்த பிரதமராக யார்? : கருத்து கணிப்பில் தகவல்

இந்திய அரசியலில் புகழ் பெற்றவர்கள் என்ற தலைப்பில் சி.என்.என்.- ஐ.பி.என். மற்றும் சின்பிசி-டி.வி.18 ஆகிய தொலைக்காட்சி சானல்கள் ஒருங்கிணைந்து கருத்துக் கணிப்பு நடத்தப்பட்டது.

19 மாநிலங்களில் சுமார் 39 ஆயிரம் பேரிடம் பல்வேறு கேள்விகள் கேட்கப்பட்டு தகவல்கள் திரட்டப்பட்டன. அந்த கருத்துக்கணிப்பு முடிவுகள் தற்போது வெளியிடப்பட்டுள்ளன. 

அடுத்த பிரதமராக யார் வரவேண்டும் என்ற கேள்விக்கு 19 சதவீதம் பேர் ராகுல்காந்தியை தேர்வு செய்துள்ளனர். கடந்த 2009-ம் ஆண்டு வெறும் 6 சதவீத ஆதரவையே பெற்றிருந்த ராகுல்காந்தி தற்போது பிரதமர் பதவி தேர்வில் முதல் இடத்துக்கு வந்துள்ளார்.

அவருக்கு அடுத்தப்படியாக மன்மோகன்சிங், சோனியாகாந்தி இருவருக்கும் தலா 10 சதவீதம் பேர் ஆதரவு தெரிவித்துள்ளனர். இவர்கள் இருவரது செல்வாக்கும் மக்களிடம் மிகவும் வீழ்ச்சி அடைந்துள்ளது. 1999-ம் ஆண்டு முதல் 2008 வரை சோனியா காந்தி தான் பிரதமர் பதவிக்கு வரவேண்டும் என்ற எண்ணம் மக்கள் மனதில் இருந்தது. தற்போது சோனியாவுக்கு அந்த அளவுக்கு மக்களிடம் ஆதரவு இல்லை என்பது கருத்துக் கணிப்பில் தெரிய வந்துள்ளது. 

பா.ஜ.க. தலைவர்களுக்கு மக்கள் மனதில் அதிக இடம் இல்லை என்பதும் கருத்துக் கணிப்பு முடிவுகளில் கூறப்பட்டுள்ளது. 2009-ம் ஆண்டு அத்வானிக்கு மக்களிடம் 15 சதவீத ஆதரவு இருந்தது. தற்போது அது 4 சதவீதமாக குறைந்து விட்டது.

குஜராத் முதல்-மந்திரி நரேந்திர மோடி பிரதமர் பதவிக்கு தகுதியானவர் என்று 2009-ல் 2 சதவீதம் பேர்தான் கூறி இருந்தனர். ஆனால் தற்போது நரேந்திர மோடிக்கு 5 சதவீதம் பேர் ஆதரவு தெரிவித்துள்ளனர். 

பிரதமர் பதவியில் மன்மோகன்சிங்கின் செயல்பாடு எப்படி உள்ளது என்ற கேள்விக்கு 56 சதவீதம் பேர் திருப்தி தெரிவித்துள்ளனர். ஆனால் கடந்த 2009ல் மக்களில் 70 சதவீதம் பேர் திருப்தி தெரிவித்திருந்தனர். தற்போது அது குறைந்துள்ளதால், பிரதமர் மன்மோகன் சிங் மீது அதிருப்தி அதிகமாகி இருப்பது தெரிய வந்துள்ளது.

மன்மோகன்சிங் செயல்பாடுகளில் அதிருப்தியுடன் உள்ளதாக 2007-ல் 16 சத வீதம் பேரும், 2009ல் 17 சதவீதம் பேரும் கூறி இருந்தனர். அந்த அதிருப்தி தற்போது 24 சதவீதமாக அதிகரித்துள்ளது. 

பிரதமர் பதவியில் மன்மோகன்சிங் நீடிக்க வேண்டுமா, கூடாதா என்ற கேள்விக்கு 33 சதவீதம் பேர், அவரை உடனே மாற்ற வேண்டும் என்று கூறியுள்ளனர். 22 சதவீதம் பேர்தான் மன்மோகன்சிங் பிரதமர் பதவியில் நீடிக்க ஆதரவு தெரிவித்துள்ளனர். மன்மோகன்சிங் பிரதமர் பதவியில் இருந்து விட்டு போகட்டும் என்று காங்கிரஸ்காரர்களில் 33 சதவீதம் கூறியுள்ளனர். ஆனால் கூட்டணி கட்சிக்காரர்களில் 25 சதவீதம் பேர் பிரதமர் பதவிக்கு மன்மோகன்சிங் சரியானவர் அல்ல என்று அதிருப்தி தெரிவித்துள்ளனர். 

மன்மோகன்சிங் பிரதமர் பதவியில் இருந்து விலகும் பட்சத்தில் அடுத்து யாரை பிரதமராக்க வேண்டும் என்று கருத்துக்கணிப்பில் ஒரு கேள்வி கேட்கப்பட்டது. அதற்கு 42 சதவீதம் பேர் ராகுல் காந்திக்கு ஆதரவாக வாக்களித்துள்ளனர்.

இதன் மூலம் அடுத்த பிரதமர் பதவிக்கு ராகுல்காந்தியை பெரும்பாலானவர்கள் விரும்புவது தெரியவந்துள்ளது. பிரணாப்முகர்ஜி, ப.சிதம்பரம் இருவருக்கும் தலா 7 சதவீதம் பேர் ஆதரவு தெரிவித்துள்ளனர். என்றாலும், பிரதமர் மன்மோகன்சிங் நல்ல மனிதர், ஊழலை கட்டுப்படுத்த அவர் முயற்சி செய்து கொண்டிருப்பதாக 27 சதவீதம் பேர் கூறி உள்ளனர். ஆனால் ஊழலை ஒழிக்க மன்மோகன்சிங் எதுவும் செய்யவில்லை என்று 31 சதவீதம் பேர் கூறியுள்ளனர். 

அடுத்த பொதுத் தேர்தலில் பா.ஜ.க.வுக்கு தலைமை ஏற்க தகுதியானவர் யார்? என்று ஒரு கேள்வி மக்களிடம் கேட்கப்பட்டது. அதற்கு 19 சதவீதம் பேர் குஜராத் முதல்-மந்திரி நரேந்திர மோடியை தேர்வு செய்துள்ளனர். பா.ஜ.க. தொண்டர்களிலும் 33 சதவீதம் பேர் மோடியைத்தான் விரும்புவது தெரிய வந்துள்ளது. நரேந்திர மோடிக்கு அடுத்த இடத்தில் சுஷ்மா சுவராஜ் 15 சதவீத ஆதரவுடன் இரண்டாவது இடத்தில் உள்ளார். ராஜ்நாத் சிங்குக்கு 7 சதவீதம், அருண்ஜெட்லிக்கு 4 சதவீத ஆதரவு உள்ளது.