ஜெயலலிதா - விஜயகாந்த் கூட்டணியை பிரிக்கவே முடியாது

அ.தி.மு.க. தே.மு.தி.க. கூட்டணியை யாராலும் பிரிக்க முடியாது  என்று புதிய பஸ் வழித்தடத்தை தொடக்கி வைத்து ஏ.கே.டி.ராஜா எம்.எல்.ஏ பேசினார்.

மதுரை மாவட்டம் திருப்பரங்குன்றம் சட்டமன்ற தொகுதிக்கு உட்பட்ட வெள்ளப்பாறைப்பட்டியில் புதிய பஸ் வழித்தடம் தொடக்க விழா 20.08.2011 அன்று நடந்தது. விழாவின் சிறப்பு அழைப்பாளராக ஏ.கே.டி.ராஜா எம்.எல்.ஏ. கலந்து கொண்டு வெள்ளப்பாறைப்பட்டியிலிருந்து

நாகமலைப்புதுக்கோட்டை, சிம்மக்கல் வழியாக மதுரை மாட்டுத்தாவணிக்கு புதிய பஸ் வழித்தடத்தை கொடி அசைத்து தொடங்கி வைத்தார். அப்போது அவர் பேசியதாவது,

கூடிய விரைவில் உள்ளாட்சி தேர்தல் நடைபெற உள்ளது. சட்டமன்றதேர்தலில் அ.தி.மு.க., தே.மு.தி.க. உள்ளிட்ட கூட்டணி கட்சிகளை வெற்றி பெறச்செய்தது போல உள்ளாட்சி தேர்தலிலும் வெற்றி பெறச்செய்ய வேண்டும். அ.தி.மு.க., தே.மு.தி.க. கூட்டணியை பிரிக்க முயற்சி நடக்கிறது. அது ஒருபோதும் நடக்காது. தமிழக முதலமைச்சர் ஜெயலலிதா, தே.மு.தி.க. தலைவர் விஜயகாந்த் கூட்டணியை பிரிக்கவே முடியாது என்பதை திட்டவட்டமாக கூறிக்கொள்கிறேன். இவ்வாறு அவர் பேசினார்.