உதயகுமார் மீதான கொலை முயற்சி வழக்கை வாபஸ் பெறக்கோரி மீனவர்கள் ஸ்டிரைக்

கூடங்குளம் மற்றும் அதன் சுற்றுவட்டார பகுதிகளில் உள்ள கடலோர கிராமங்களில் ரூ500 கோடியில் வளர்ச்சிப்பணிகள் மேற்கொள்ளப்படும் என்று முதல்-அமைச்சர் ஜெயலலிதா தலைமையில் நடந்த அமைச்சரவை கூட்டத்தில் அறிவிக்கப்பட்டது.

இதனைத்தொடர்ந்து வளர்ச்சி பணிகள் மேற்கொள்ளப்படும் பஞ்சாயத்து தலைவர்களுடன் நெல்லை மாவட்ட கலெக்டர் செல்வராஜ் ஆலோசனை நடத்தினார்.

அப்போது அவர், வளர்ச்சிப் பணிகளை நிறைவேற்ற ஏதுவாக பஞ்சாயத்துகளில் கூட்டம் நடத்தி தீர்மானம் நிறைவேற்றுமாறு கேட்டுக்கொண்டார். அதனடிப்படையில் கூடங்குளம் அணுஉலைக்கு ஆதரவு அளிக்கும் பஞ்சாயத்துகளில் கூட்டங்கள் நடத்தி அரசுக்கு ஆதரவாக தீர்மானம் நிறைவேற்றப்பட்டன.

இந்த நிலையில் கூடங்குளம் அணுஉலைக்கு ஆதரவாக செயல்பட்டு வந்த இடிந்தகரை பஞ்சாயத்து தலைவி சகாயபெக்ளின் எஜிடினின் கணவர் சகாயராஜ், அவரது அண்ணன் ஸ்டாலின் ஆகியோரை நேற்று முன்தினம் இரவு ஒரு கும்பல் தாக்கியது.

இந்த தாக்குதலில் காயமடைந்ததாக கூறி நாகர்கோவில் ஆசாரி பள்ளம் அரசு ஆஸ்பத்திரியில் அனுமதிக்கப்பட்ட அவர்கள் இருவரும், தாக்குதல் குறித்து கூடங்குளம் போலீசில் தனித்தனியாக புகார் தெரிவித்தனர். அவர்கள் தங்களது புகாரில் கூடங்குளம் அணுஉலைக்கு எதிரான போராட்டக்குழு ஒருங்கிணைப்பாளர் உதயகுமார், புஷ்பராயன், மைபா ஜேசுராஜன் உள்பட 10பேர் தங்களை வழிமறித்து தாக்கி கொல்ல முயன்றதாக கூறியிருந்தனர்.

அந்த புகார்களின் அடிப்படையில் உதயகுமார், புஷ்பராயன், மைபா ஜேசுராஜன் உள்ளிட்ட 10 பேர் மீது போலீசார் கொலைமுயற்சி வழக்கு பதிந்தனர். இது போராட்டக்காரர்கள் மத்தியில் பெரும் அதிர்ச்சியை ஏற்படுத்தியது.

உதயகுமார் உள்ளிட்டோர் மீது கொலை முயற்சி வழக்குபதிவு செய்ததற்கு போராட்டக்குழு கண்டனம் தெரிவித்துள்ளது. அவர்கள் மீதான வழக்கை வாபஸ் பெறக்கோரி மீனவர்கள் நேற்று முதல் வேலைநிறுத்த போராட்டத்தை தொடங்கியுள்ளனர்.

தற்போது விசைப்படகு மீனவர்களுக்கு மீன்பிடி தடைகாலம் தொடங்கியிருப்பதால் நெல்லை மாவட்டத்தில் விசைப்படகு மீனவர்கள் மீன்பிடிக்க கடலுக்கு செல்லவில்லை. இந்நிலையில் உதயகுமார் உள்பட 10பேர் மீது கொலைமுயற்சி வழக்கு பதியப்பட்டுள்ளதால், அதனை கண்டித்து இடிந்தகரை, பெருமணல், கூத்தங்குளி, ஆவுடையாள்புரம் ஆகிய பகுதிகளை சேர்ந்த நாட்டுப் படகு மீனவர்கள் கடலுக்கு மீன்பிடிக்க செல்லாமல் நேற்று முதல் வேலைநிறுத்தத்தில் ஈடுபட்டுள்ளனர்.

நாட்டுப்படகு மீனவர்கள் இன்று 2-வது நாளாக கடலுக்கு மீன்பிடிக்க செல்லவில்லை. இதுகுறித்து கூடங்குளம் அணுஉலைக்கு எதிரான போராட்டக்குழுவை சேர்ந்த புஷ்பராயன் கூறியதாவது:-

உதயகுமார் , மைபா ஜேசுராஜன் உள்பட 10 பேர் இடிந்தகரை பஞ்சாயத்து தலைவியின் கணவரை கொல்ல முயற்சி செய்ததாக பொய் வழக்கு பதியப்பட்டுள்ளது. போலீசாரின் இந்த செயல், அமைதியாக போராட்டம் நடத்திவரும் மக்களை வன்முறைக்கு தூண்டுவதாக உள்ளது.

இதனை கண்டித்து இடிந்தகரை, பெருமணல், கூத்தங்குளி, ஆவுடையாள்புரம் ஆகிய பகுதிகளை சேர்ந்த நாட்டுப்படகு மீனவர்கள் வேலைநிறுத்தத்தில் ஈடுபட் டுள்ளர். உதயகுமார் உள்பட 10பேர் மீது போடப்பட்டுள்ள கொலைமுயற்சி வழக்கை வாபஸ் வாங்கும்வரை மீனவர்களின் இந்த போராட்டம் தொடரும். இவ்வாறு அவர் கூறினார்.