கலக்கியது கங்குலியின் புனே வாரியஸ்- மும்பை இந்தியன்ஸை பதம் பார்த்தது!

நடப்பு சாம்பியனான சென்னை சூப்பர்கிங்ஸ் அணியை சொந்த மண்ணில் தோற்கடித்த மும்பை இந்தியன்ஸ் அணி தமது சொந்த மண்ணில் புனேவாரியர்ஸ் அணியிடம் சரணாகதி அடைந்தது.புனேவாரியஸின் அசோக் டிண்டாவின் அபாரபந்துவீச்சை மும்பை இந்தியன்ஸ் அணியால் எதிர்கொள்ள முடியவில்லை.

பெரும் எதிர்பார்ப்புகளுக்கிடையே தொடங்கிய போட்டியில் ஹர்பஜன்சிங் தலைமையிலான மும்பை இந்தியன்ஸ் அணி டாஸ் வென்று பீல்டிங்கை முதலில் தேர்வு செய்தது. நேற்றைய போட்டியில் காயம் காரணமாக சச்சின் இடம்பெறவில்லை.

புனே வாரியர்ஸ் அணி

இதையடுத்து கங்குலி தலைமையிலான புனேவாரியர்ஸ் அணி பேட்டிங் செய்ய களமிறங்கியது. தொடக்க வீரர்களாக மனீஷ் பாண்டேவும் கேப்டன் கங்குலியும் களம் இறங்கினர். முதல் ஓவரை மும்பை இந்தியன்ஸ் அணியின் மாலிங்க வீசினார். 5-வது பந்திலேயே புனேவாரியர்ஸ் அணி ரன் ஏதும் எடுக்காத நிலையிலேயே பாண்டே போல்டாகி வெளியேறினார். இதைத் தொடர்ந்து பார்னல் களமிறக்கப்பட்டார். பார்னலும் கங்குலியும் சிங்கிள் ரன்களாக எடுத்துக் கொண்டிருந்த நிலையில் 3-வது ஓவர் 4-வது பந்தில் கங்குலியை ஹர்பஜன்சிங்கின் சுழல்பந்து பதம் பார்த்து வெளியேற்றினார். டபுள் டிஜிட் ரன்களைக் கூட எட்டாத நிலையில் 2 விக்கெட்டுகளை பறிகொடுத்த நிலையில் 4 ஓவர் 5 பந்தில் பார்னலையும் எம்.எம்.பட்டேல் அவுட்டாகி வெளியேற்றினார்.

இந்நிலையில் ஆடுகளத்தில் நின்றிருந்த பெர்குசனுடன் உள்ளூர் ஆட்டக்காரரான ஆர்வி. உத்தப்பா இணைந்து கொள்ள ஆட்டத்தின் போக்கில் சற்றே மாற்றம் தென்பட்டது. ஆனாலும் இந்த திருப்தியும் கூட சில ஓவர்கள்கூட நீடிக்கவில்லை. 8வது ஓவர் 5-வது பந்தில் பெர்குசன் அவசரப்பட்டு ரன் எடுக்க முயற்சித்து அவுட் ஆனார்.

களத்தில் நின்ற உத்தப்பாவுடன் ஸ்மித் கைகோர்த்துக் கொண்டார். கங்குலியின் புனேவாரியர்ஸ் அணி மிகமோசமான ஸ்கோரைத்தான் எடுக்குமோ என்ற நிலையை இந்த ஜோடி மாற்றியது. இருவரும் நிலைத்து நின்று ரன்களை சேர்த்து புனே வாரியஸ் அணிக்கு கெளரவத்தைச் சேர்த்தனர். 15-வது ஓவர் முதல் பந்தில் உத்தப்பா ஒரு சிக்சர் அடிக்க முயற்சித்த நிலையில் அவுட் ஆகிப்போனார். உத்தப்பா அவுட் ஆன அடுத்த ஓவரிலேயே சாமுவேல்ஸும் அவுட் ஆனார். ஸ்மித் பொறுமையாக ஆடி 39 ரன்களைச் சேர்த்தார். கடைசி 3 ஓவர்களை புவனேஷ்வர் குமாரும் முரளி கார்த்திக்கும் எதிர்கொண்டு ஒருவழியாக 129 ரன்களை சேர்த்தனர். இதில் முரளி கார்த்திக்கின் ஒரு சிக்சரும் அடக்கம்.

மும்பை இந்தியன்ஸ் அணி

மிகவும் வலுவாக நல்ல பார்மில் இருக்கக் கூடிய மும்பை இந்தியன்ஸ் அணிக்கு வெற்றி இலக்கான 130 என்பது மிகவும் எளிதானது என்றுதான் கருதப்பட்டது. சென்னை சூப்பர் கிங்ஸ் அணிக்கு எதிராக வெளுத்துக் கட்டி பெருமை தேடிக் கொண்ட லீவி முதல் ஓவரிலேயே டக் அவுட் ஆகிப் போனது அந்த அணிக்கு பெரும் சோகம்.

புனேவாரியர்ஸின் புயல்வேக பந்துவீச்சில் ஒரு ரன்களிலேயே ராயுடுவும் ரோகித் சர்மாவும் வெளியேறிப் போக பரிதாபமாக நின்று கொண்டிருந்தது மும்பை அணி 2 ஓவரில் 3 விக்கெட்டுக்கு 5 ரன்கள் என்ற நிலையில்!

மும்பை இந்தியன்ஸ் அணிக்கு கொஞ்சம் நம்பிக்கை ஊட்டும் வகையில் பிராங்க்ளினும் தினேஷ் கார்த்திக்கும் ஜோடி சேர்ந்து ஆடினர். ஒருவழியாக தட்டுத் தடுமாறி 49 ரன்களுக்கு மும்பை இந்தியன்ஸ் வந்த போது முரளி கார்த்திக்கின் சுழல் பந்தில் தினேஷ் கார்த்திக் தமது விக்கெட்டைப் பறிகொடுக்க வேண்டிய நிலை வந்தது. இதைத் தொடர்ந்து சச்சினுக்குப் பதிலாக இடம்பெற்றிருந்த சூர்யகுமார் யாத்வ் டக் அவுட் பெருமையோடு வெளியேறினார். போலார்டும் பெரிதாக சாதிக்கவில்லை. பிராங்க்ளின் மட்டும் 32 ரன்களை எடுத்திருந்தார்.

பின்வரிசையில் கேப்டன் ஹர்பஜனால் மட்டுமே 18 ரன்களைச் சேர்க்க முடிந்தது. 20 ஓவர்களில் 9 விக்கெட்டுக்கு மும்பை இந்தியன்ஸ் அணியால் 100 ரன்களை மட்டுமே எட்ட முடிந்து சொந்த மண்ணிலேயே தோல்வியைத் தழுவியது..

அசோக் டிண்டா அபாரம்

புனேவாரியஸ் அணியின் ஹர்பஜன்சிங்கும் புதிய வரவான டிண்டாவும் தமது பந்துவீச்சின் முழுத் திறமையையுமே வெளிப்படுத்தினர். டிண்டா 18 ரன்களை மட்டுமே கொடுத்து 4 விக்கெட்டுகளை அள்ளினார். முரளி கார்த்திக்கும் 14 ரன்களைக் கொடுத்து 2 விக்கெட்டுகளை வீழ்த்தினார். சாமுவேல்ஸ் மற்றும் ராகுல் சர்மாவின் பந்துவீச்சும் மும்பை இந்தியன்ஸ் அணியை கட்டுப்படுத்தியிருந்தது.

கங்குலி வியூகம்

சீனியர் வீரர்கள், ஜூனியர் வீரர்கள் கலந்த கலவையாக இருந்த புனேவாரியர்ஸ் அணியில் தமது வழக்கமான வியூகத்திற்கு அமைய ஜூனியர்ஸை நன்றாக கங்குலி பயன்படுத்திக் கொண்டார். கங்குலியின் வழக்கமான இந்த யுக்தி அவருக்கு இப்பொழுது கை கொடுத்திருக்கிறது.

ஐ.பி.எல். போட்டிகளில் கண்டுகொள்ளப்படாமல் கைவிடப்பட்ட கங்குலியை தேடிப் பிடித்து புனேவாரியர்ஸ் கூட்டி வந்ததற்கும் பலன் கிடைத்திருக்கிறது.

சொந்த மண் பாதகம்

ஐ.பி.எல்.5-வது சீசனில் உள்ளூர் கிரிக்கெட் மைதானங்கள் வீரர்களுக்குத்தான் ராசி போல... அணிகளுக்கு சூனியம் போல...

சென்னை சூப்பர்கிங்ஸ் அணி சொந்த மண்ணில் தோல்வியைத் தழுவியது...

கொல்கத்தா நைட் ரைடர்ஸ் அணி சொந்த மண்ணில் டெல்லி டேர்டெவில்ஸிடம் வீழ்ந்தது..

நேற்றைய ஆட்டத்தில் மும்பை இந்தியன்ஸ் அணி, வலுவில்லாத புனேவாரியர்ஸிடம் சரணடைந்தது.