திருவள்ளூர் மாவட்டம், கும்மிடிப்பூண்டி வட்டம் தேர்வாய் கண்டிகை கிராமத்தில் உள்ள நிலங்கள், கடந்த ஆட்சி காலத்தில் கையகப்படுத்தப்பட்டு, சிப்காட் தொழிற்பூங்கா அமைக்கப்பட்டு வருகிறது. இதற்கு அக்கிராம மக்கள் கடும் எதிர்ப்பு தெரிவித்து, உண்ணாவிரதம், ஆர்ப்பாட்டம் போன்ற போராட்டங்களை நடத்தி வருகின்றனர்.
சென்னை மெமோரியல் ஹால் அருகே நேற்று நடைபெற்ற ஆர்ப்பாட்டத்திற்கு, சென்னை ஐகோர்ட்டு வக்கீல் பெ.தமிழினியன் தலைமை தாங்கினார்.
இந்திய கம்யூனிஸ்டு கட்சியின் தேசிய கட்டுப்பாட்டுக்குழு தலைவர் ஆர்.நல்லகண்ணு, சிறப்பு அழைப்பாளராக கலந்துகொண்டு பேசினார்.
ஆர்ப்பாட்டத்தில், தலித் மண்ணுரிமைக் கூட்டமைப்பின் அமைப்பாளர் சி.நிக்கோலஸ், இந்திய கம்யூனிஸ்டு கட்சியின் மாநில துணை செயலாளர் கோ.பழனிச்சாமி உள்பட பலர் கலந்துகொண்டனர்.
முன்னதாக, இந்திய கம்யூனிஸ்டு கட்சியின் தேசிய கட்டுப்பாட்டுக்குழு தலைவர் ஆர்.நல்லகண்ணு நிருபர்களுக்கு பேட்டியளித்தார்.
அப்போது அவர், ‘’தேர்வாய் கண்டிகை கிராமத்தை சுற்றி 25 குக்கிராமங்கள் உள்ளன. அப்பகுதியில் 1,500 ஹெக்டேர் அளவில் வன நிலம் உள்ளது. 4 ஏரிகளும், 10 குட்டைகளும் அங்கு உள்ளன. இந்த விவசாய நிலம், சிப்காட் தொழிற் பூங்கா அமைப்பதற்காக கையகப்படுத்தப்பட்டுள்ளது.
அதற்கு எதிர்ப்பு தெரிவித்து அக்கிராம மக்கள் கடந்த பிப்ரவரி மாதம் உண்ணாவிரத போராட்டம் நடத்தினார்கள். அப்போது, தொழிற்பூங்கா அமைக்கும் திட்டம் கைவிடப்படும் என்று கலெக்டர் உறுதி அளித்ததின் பேரில், போராட்டம் கைவிடப்பட்டது.
பாராளுமன்ற தேர்தலின்போது, இப்போதைய முதல்-அமைச்சர் ஜெயலலிதா, சிப்காட் தொழிற் பூங்காவுக்கு ஆக்கிரமிக்கப்பட்ட நிலத்தை மீட்டுக்கொடுப்பேன் என்று உறுதி அளித்தார். ஆனால், தற்போது அந்த இடத்தில் பிரஞ்சு டயர் கம்பெனி அமைக்கும் பணி நடந்து வருகிறது.
இதுபோன்ற கம்பெனிகளால் விவசாயம் கெடும், சுற்றுச்சூழல் பாதிக்கப்படும். எனவே, இதை உடனடியாக தடுக்க வேண்டும். சிப்காட் தொழிற் பூங்காவுக்கு வழங்கப்பட்ட நிலத்தை மீட்க வேண்டும். இதற்கு, இந்திய கம்யூனிஸ்டு கட்சி, மார்க்சிஸ்ட் கம்யூனிஸ்டு கட்சி, தலித் அமைப்புகள் ஆதரவு அளித்துள்ளன. அ.தி.மு.க. அரசு உரிய நடவடிக்கை எடுக்கும் என்று நம்புகிறோம்.
மேல் முறையீட்டு முடிவை தமிழக அரசு கைவிட்டு, ஐகோர்ட்டு உத்தரவுப்படி சமச்சீர் கல்வியை உடனே அமல்படுத்த வேண்டும்’என்று கூறினார்.
No comments:
Post a Comment