தற்கொலையெல்லாம் தற்கொலையல்ல... சந்தேகத்தை கிளப்பும் டைரக்டர்

இதுவரை சொல்லப்படாத கதை என்று கூறுவதற்கு பதிலாக இதுவரை 'கொல்லப்படாத' கதை என்று சொல்லலாம். ஏனென்றால் ஒத்திகை படத்தின் நாட் அப்படி?

மலை பிரதேசங்களில் அமைந்திருக்கிற தற்கொலை பாறைகளுக்கு வாயிருந்தால் ஓராயிரம் கதைகளை சொல்லும். இதில் பாதி கதைகள் காதல் கதைகளாகதான் இருக்கும். மலை பிரதேசங்களில் நடக்கும் இளம் ஜோடிகளின் தற்கொலை எல்லாம் நிஜமாகவே தற்கொலைதானா என்ற கேள்வியை எழுப்புவதுதான் ஒத்திகை படத்தின் அழுத்தமான நாட் என்கிறார் இப்படத்தின் இயக்குனரும் தயாரிப்பாளருமான ஏ.எம்.பாஸ்கர்.

ஒரு புலனாய்வு புலியை போல இவர் ஏராளமாக அலைந்து திரிந்து சேகரித்த தகவல்களின்படி இந்த கதையை அமைத்திருக்கிறாராம். சமுதாயம் தற்கொலை என்று நினைத்து கவலைப்படும் பல சாவுகள், தற்கொலையல்ல, கொலை தெரியுமா என்ற அதிர்ச்சியை கிளப்புமாம் இந்த ஒத்திகை படம். ஹீரோவாக நடிப்பவர் நம்ம ஜெய் ஆகாஷ். ஹீரோயினாக நடிப்பவர் அர்ச்சனா சர்மா.

எப்படியாவது ஒரு ஹிட் கொடுத்துவிட வேண்டும் என்ற வெறியோடு ஓடி ஓடி உழைத்துக் கொண்டிருக்கிறார் ஜெய் ஆகாஷ். நல்ல கதை இருந்தால் மட்டுமே வெளியாட்களுக்கு கால்ஷீட். இல்லையென்றால் நானே நடிக்கும் படத்தை நானேதான் இயக்குவேன் என்று அடம் பிடித்துக் கொண்டிருக்கும் இவர் இந்த படத்தில் நடிக்கும் போதே ஒத்திகையில் ஏதோ விஷயம் இருக்கு என்று புரிகிறது. நமது நம்பிக்கையையும், ஆகாஷின் நம்பிக்கையையும் காப்பாற்ற வேண்டியவர் பாஸ்கர்தான்.