இலங்கை சென்ற பாடகர்கள் மனோ, கிரிஷ்,சுசித்ராவுக்கு எதிர்ப்பு: சென்னை திரும்பும்படி நடிகர் சங்கம் உத்தரவு

இலங்கையில் உள்ளாட்சி தேர்தல் நடந்து வருகிறது. தமிழர்கள் வசிக்கும் யாழ்ப் பாணம் பகுதியில் வெற்றி பெற்று தமிழர்கள் மத்தியில் ஆதரவு இருப்பதாக காட்டிக் கொள்ள ராஜபக்சே முயற்சிக்கிறார்.

இதற்காக கிளிநொச்சியில் தமிழக பின்னணி பாடகர்களை அழைத்து இன்று இசை கச்சேரி நடத்த ராஜபக்சே கட்சியினர் ஏற்பாடு செய்தனர். தமிழ் பகுதியில் ஒலிபெருக்கி மூலம் இதனை விளம்பரப்படுத்தினர். ராஜ பக்சேவுக்கு ஆதரவு திரட்ட தமிழ்நாட்டில் இருந்து பாடகர்கள் மனோ, கிரிஷ், சுசித்ரா, நடிகை கஸ்தூரி ஆகியோர் வருகிறார்கள் என்று ஒலிபெருக்கியில் தெரு தெருவாக பேசியபடி சென்றனர்.

இது ஈழத்தமிழர்கள் மத்தியில் ஆத்திரத்தை ஏற்படுத்தியது. இதுபற்றி தமிழ் திரையுலக சங்கங்களுக்கும் தெரிய வந்தது. நிகழ்ச்சியில் கலந்து கொள்ளக்கூடாது என எதிர்ப்பு தெரிவிக்கப்பட்டது. நடிகர் சங்கமும் உடனடியாக சென்னை திரும்புமாறு கட்டளையிட்டது.

இதையடுத்து நால்வரும் பாட்டு கச்சேரியை ரத்து செய்தனர். இலங்கையில் உள்ள பாடகர் கிரிஷிடம் மாலை மலர் நிருபர் தொடர்பு கொண்டு கேட்டபோது, அவர் கூறியதாவது:-

கலையரங்கம் திறப்பு விழா நிகழ்ச்சியொன்றில் பாடவேண்டும் என்று சொல்லித்தான் எங்களை அழைத்து வந்தனர். இங்கு வந்த பிறகுதான் பிரச்சினை எங்களுக்கு தெரிய வந்தது. நிகழ்ச்சியில் பங்கேற்க வேண்டாம் என்று நடிகர் சங்கத்தினர் தொடர்பு கொண்டு பேசினார்கள்.

இதையடுத்து அந்த நிகழ்ச்சியை ரத்து செய்து விட்டோம். விமான நிலையத்துக்கு திரும்பிக்கொண்டு இருக்கிறோம். இன்று இரவு அல்லது நாளை காலை விமானத்தில் சென்னை வந்து விடுவோம்.

இவ்வாறு அவர் கூறினார்.