ஸ்ருதிஹாசனுக்கு கேன்சர்

ஏழாம் அறிவு படம்தான் தமிழ்சினிமாவின் அடுத்த ஜாக்பாட்டாக இருக்கும் என்று எதிர்பார்ப்புகள் நிலவி வருகிறது. மற்றவர்களை விடவும் இந்த படத்தை அதிகம் எதிர்பார்த்துக் கொண்டிருப்பவர் ஸ்ருதிஹாசன்தான். அவர் இதுவரை நடித்த எந்த படமும் வெற்றி பெற்றதில்லை. இத்தனைக்கும் கதைகளை உன்னிப்பாக கேட்டுதான் ஒப்புக் கொள்கிறார். அப்படியிருந்தும் தரையிலிருந்து வேலிக்கு தாவவே இல்லை வெற்றி எனும் ஓணான்.

படத்தின் நீளம் எதிர்பார்த்ததை விட சற்று அதிகமாக இருப்பதாக ஃபீல் பண்ணிய ஏ.ஆர்.முருகதாஸ் எங்கே கத்திரியை நுழைப்பது என்பதில் பெரும் குழப்பத்தில் ஆழ்ந்திருப்பதாகவும் தகவல். இந்த நேரத்தில்தான் ஸ்ருதிக்கு படத்தில் எந்த மாதிரி கேரக்டர் என்பது குறித்து தகவல் கசிய ஆரம்பித்திருக்கிறது.

இதில் கேன்சர் பேஷன்ட்டாக நடிக்கிறாராம் அவர். தமிழ்சினிமா விதிப்படி கேன்சர் பேஷன்ட்டாக இருந்தால் ரீலுக்கு 100 லொக்குகள் வீதம் இருமிக்கொண்டே இருப்பார் ஹீரோ. அல்லது ரசிகர்களின் முகத்தில் தெறிக்கிற அளவுக்கு ரத்த வாந்தி எடுப்பார். இதையெல்லாம் தவிர்த்து புதுசாக ஏதாவது யோசித்திருப்பார் முருகதாஸ் என்பதை மட்டும் இப்போதைக்கு உறுதியாக நம்பலாம்.