மறைந்த முன்னாள் முதல் அமைச்சர் எம்.ஜி.ஆர் வாழ்ந்த காலத்தில் வெளிர் பச்சை நிறத்துடன் கூடிய, 4777 என்ற அம்பாசிடர் காரில் சிகப்பு விளக்கு எரிந்தபடி வலம்வருவார். அந்த காரின் நிறமும், எண்ணும் அவரது ரசிகர்களுக்கும், கட்சியினருக்கும் தெரியும்.
அதே நிறம், அதே எண் கொண்ட கார் ஒன்று, சென்னை மெரினா கடற்கரையில் உள்ள எம்.ஜி.ஆர். சமாதி முன்பு 06.08.2011 அன்று மாலை நின்று கொண்டிருந்தது. மெரினா கடற்கரையில் வந்தவர்கள், இந்த காரை பார்த்தவுடன், ஆச்சரியத்துடன் வந்து பார்த்தனர்.
அங்கு நின்ற எம்.ஜி.ஆர். ரசிகர்கள் சிலர், தலைவர் கார்தான் மீண்டும் வந்து விட்டதோ?' என்று காரை தொட்டு கும்பிட்டனர். பலர் அந்த கார் முன்னால் நின்றுகொண்டு செல்போன் கேமராவால் புகைப்படம் எடுத்துக்கொண்டனர்.
அந்த நேரத்தில் கார் உரிமையாளரான வாசன் என்பவர், எம்.ஜி.ஆர். சமாதிக்கு மாலை அணிவித்துவிட்டு அங்கு வந்தார். பின்னர், காருக்கு தீபாராதனை காட்டி வழிபட்டார். அதனைத் தொடர்ந்து, காரை புகைப்படம் எடுத்துக் கொண்டவர்களுடன் நின்று, தானும் புகைப்படம் எடுத்துக்கொண்டார்.
பின்னர், வாசன் கூறியதாவது: நான் எம்.ஜி.ஆர். மீது கொண்ட தீவிர அன்பால், எனது பெயரை எம்.ஜி.ஆர். வாசன் என்று மாற்றிக்கொண்டேன். நான் தற்போது, தென்சென்னை மாவட்ட ஜெயலலிதா பேரவை துணை தலைவராக உள்ளேன்.
எம்.ஜி.ஆர். பயன்படுத்திய கார், தியாகராய நகரில் உள்ள, அவரது நினைவிடத்தில் உள்ளது. இந்த காரைப்பற்றி பொதுமக்கள் தெரிந்துகொள்ள வேண்டும் என்பதற்காக, அதே கம்பெனியின் காரை புதிதாக வாங்கினேன்.
எம்.ஜி.ஆர். காரின் நிறத்தை போன்றே இந்த காருக்கும் வர்ணம் பூசினேன். மேலும், காரின் எண், சிகப்பு விளக்கு, அ.தி.மு.க. கொடி உள்ளிட்ட அம்சங்களை, அந்த காரில் இருப்பதை போன்றே வடிவமைத்தேன். பொதுமக்களே என்னிடம், இது எம்.ஜி.ஆர். பயன்படுத்திய காரா? என்று கேட்கிறார்கள். இதற்காகவே கூடுதலாக ரூ.80 ஆயிரம் செலவு செய்தேன். இனி எம்.ஜி.ஆர். நினைவுடன் இதே காரில் வலம்வருவேன் என்றார்.
No comments:
Post a Comment