"தலப்பாக்கட்டு பிரியாணி' பெயர் யாருக்கு சொந்தம்: சென்னை உயர் நீதிமன்றம் தீர்ப்பு

தலப்பாக்கட்டு என்ற பெயரை சென்னை ராவுத்தர் ஓட்டல் நிர்வாகத்தினர் பயன்படுத்தக் கூடாது என்று சென்னை ஐகோர்ட்டு உத்தரவிட்டுள்ளது.

பல ஆண்டுகளாக பயன்படுத்தி வரும் தலைப்பாகட்டி' என்ற பிரபலமான வர்த்தக பெயரின் கடைசி எழுத்தை திருத்தி,  தலைப்பாகட்டு' என்று மாற்றிக் கொண்டு, சென்னை ராவுத்தர் தலப்பாக்கட்டு பிரியாணி நிர்வாகத்தினர் பயன்படுத்தி வருவதாக, அவர்கள் மீது திண்டுக்கல்லைச் சேர்ந்த தலப்பாக்கட்டி நாயுடு ஆனந்த விலாஸ் பிரியாணி ஓட்டல் நிர்வாகத்தினர் வழக்கு தொடர்ந்தனர்.

இதனால் வாடிக்கையாளர்களுக்கு குழப்பம் ஏற்படுவது மட்டுமல்ல, தங்களின் வர்த்தகம் பெருமளவில் பாதிக்கப்படுவதாகவும் வழக்கில் கூறியிருந்தனர். இதனால் ராவுத்தர் ஓட்டல் நிர்வாகத்தினர், தலப்பாகட்டு என்ற பெயரை பயன்படுத்துவதற்கு தடை விதிக்க வேண்டும் என்றும் கோரியிருந்தனர்.

இந்த மனுவை நீதிபதிகள் ஆர்.பானுமதி, பி.ராஜேந்திரன் ஆகியோர் விசாரித்தனர். அவர்கள் பிறப்பித்த உத்தரவு வருமாறு:

தலப்பாக்கட்டி மற்றும் தலப்பாக்கட்டு ஆகிய வர்த்தக குறியீட்டுப் பெயர்களின் பெரிய அளவில் வித்தியாசம் இல்லை. அந்த வார்த்தைகளை உச்சரிக்கும் போது ஒன்று போலத்தான் உள்ளன. இரண்டு ஓட்டலுமே அசைவ உணவுகளையே விற்பனை செய்கின்றன.

எனவே அசைவ உணவுக்காக செல்லும் வாடிக்கையாளர்களுக்கு இந்த இரண்டு ஓட்டல்களின் வித்தியாசத்தை அறிந்து கொள்வது அவசியம். இந்தப் பெயர்கள் மூலம் வித்தியாசத்தை அறிவது கடினம். பெரும்பாலானவர்கள், பெயர்ப் பலகையில் எழுதப்பட்ட பெயரில் கடைசி எழுத்துவரை வாசித்து வித்தியாசத்தை தெரிந்து கொள்ளமாட்டார்கள்.

பிற்காலத்தில் தலப்பாகட்டு என்ற பெயரை பயன்படுத்தும் சென்னை ராவுத்தர் ஓட்டல் நிர்வாகத்தினர், அந்த பெயரை நீக்குவதில் சிரமம் ஏற்படாது. எனவே, திண்டுக்கல் தலப்பாக்கட்டி ஓட்டல் நிறுவனத்தினரே இனி தலைப்பாகட்டி என்ற பெயரைப் பயன்படுத்த வேண்டும்.

சென்னை ராவுத்தர் தலப்பாக்கட்டு பிரியாணி ஓட்டல் நிர்வாகத்தினர் தலைப்பாகட்டு என்ற பெயரை பயன்படுத்தக் கூடாது. அந்த பெயரை இன்னும் 6 வாரத்துக்குள் நீக்க வேண்டும். இது சம்பந்தமாக 2 தரப்பினருக்கும் இடையே நடந்து வரும் சிவில் வழக்கை விரைவில் முடித்துக் கொள்வதற்கு 2 தரப்பினரும் ஒத்துழைக்க வேண்டும். இவ்வாறு அதில் கூறப்பட்டுள்ளது.