பிரபுதேவாவுடன் காதல் முறிந்தது ஏன்?: நயன்தாரா பரபரப்பு பேட்டி

தமிழில் கவர்ச்சியாக கலக்கிய நடிகை நயன்தாரா முதலில் சிம்புவுடன் இணைத்து பேசப்பட்டார். பின்னர் நடிகர் பிரபுதேவாவை தீவிரமாக காதலித்தார். இருவரும் திருமணம் செய்து கொள்ளும் தேதிகூட முடிவானது.

பிரபுதேவாவுடன் ஏற்பட்ட காதலால் தன்னை தேடிவந்த பட வாய்ப்புகளை நயன்தாரா உதறி தள்ளினார். ஒரு ஆண்டாக படப்பிடிப்பு எதிலும் அவர் கலந்து கொள்ளவில்லை. 

இந்நிலையில் பிரபுதேவா மனைவி, குழந்தைகளை பிரிய மனம் இல்லாமல் இறுதலைக் கொள்ளியாக தவித்தார். அவரை விவாகரத்து செய்ய முடியாததால் நயன்தாரா முடிவில் மாற்றம் ஏற்பட்டது. திடீரென பிரபுதேவாவுடன் காதலையும், திருமண முடிவையும் கைவிட்டார்.

காதல் முறிவை அறிவித்த உடன், நயன்தாராவை தேடி மீண்டும் சினிமா வாய்ப்புகள் வரத் தொடங்கியுள்ளன. தற்போது நயன்தாரா கையில் 4 படங்கள் உள்ளன. ஒரு ஆண்டு இடைவெளிக்கு பிறகு, கிருஷ்ணாவின் கிருஷ்ணம் வந்தே ஜகத்குரு என்ற தெலுங்குப் படத்தில் அவர் நடித்து வருகிறார்.

ஐதராபாத் செட்டில் படப்பிடிப்பில் இருந்த நயன்தாராவை, சந்தித்து, பிரபுதேவாவுடன் காதல் முறிவு ஏற்பட்டதற்கு காரணம் என்ன? என்று கேட்டபோது அவர் அளித்த பதில் வருமாறு:- 

காதலுக்காக எதையும் செய்ய நான் தயாராக இருக்கிறேன். பிரபுதேவாவுக்காக சிலவற்றை விட்டுக் கொடுத்தேன். ஆனால், திருமணம் வரை சென்ற எங்கள் காதல் முறிந்துவிட்டது. இது நடப்பதுதான். இது என் விஷயத்தில் மட்டுமல்ல, எந்தவொரு காதலையோ அல்லது திருமணத்தையோ எடுத்துக் கொண்டால், அதில் முறிவு ஏற்படுவது என்பது நடக்கத்தான் செய்கிறது. 

பொதுவாக காதல் வாழ்க்கையிலும், திருமண வாழ்க்கையிலும், முழுவதுமாக புரிந்து கொள்ளாமை என்பது இருக்கதான் செய்யும். இதனால் லேசான சச்சரவுகள் வருவதுண்டு. இது ஒரு எல்லையோடு நின்று விடவேண்டும். எல்லை மீறி போகும் போதுதான், காதல் முறிவு, திருமண முறிவு ஏற்படுகின்றன. என் விஷயத்திலும் அப்படித்தான் நடந்தது.

சில விஷயங்களை என்னால் சகித்துக் கொள்ள முடியவில்லை. பிரச்சினைகளை கையாள முடியவில்லை, அல்லது தெரியவில்லை.   உலகில் நிலையானது என்று எதுவும் கிடையாது. மக்கள் மாறுகின்றனர். சூழ்நிலைகள் மாறுகின்றன. செயல்பாடுகள் மாறுகின்றன. அதுபோன்றதொரு மாற்றம், என்னை பிரியச் செய்தது.

எங்கள் காதல் முறிவுக்கு பல காரணங்கள் இருக்கலாம். இதற்கு மேல் இந்த விஷயத்துக்குள் ஆழமாக செல்ல நான் விரும்பவில்லை. முழுக்க முழுக்க இது எனது சொந்த விஷயம். எனது விவகாரத்தை உலகுக்கு வெளிச்சம் போட்டுக் காட்டவேண்டிய அவசியமும் கிடையாது.

என்னைப் பற்றி பத்திரிகைகள் ஏதேதோ எழுதின. வதந்திகளை பரப்பின. நான் எதற்கும் பதில் சொல்லாமல் அமைதியாக இருந்தேன்.   இப்போது நிலைமை மாறிவிட்டது. உறவு முறிந்து விட்டது. எப்போது ஒரு உறவு சரியாக இல்லையோ, அப்போது எல்லாமே மாறி விடுவது இயற்கைதானே?

இதற்கு நூறு காரணங்கள் இருக்கலாம். அல்லது காரணங்களே இல்லாமலும் போகலாம். நான் பிரபுதேவாவுடன் பழகிய போது, 100 சதவீதம் உண்மையாக நடந்து கொண்டேன். ஆனால், இதற்கு மதிப்பில்லை எனும் போது, உறவை முறித்துக் கொள்வதை தவிர, வேறு வாய்ப்பு என்னவாக இருக்க முடியும்?

எங்களது இந்த காதல் பாதியில் முறிந்து போகும் என்று நான் ஒருபோதும் நினைத்தது கிடையாது. ஆனால், வாழ்க்கையில் எது வேண்டுமானாலும் நடக்கலாம் என்பதை, என் விஷயம் உறுதிப்படுத்தியுள்ளது. காதல் வாழ்க்கையோ, திருமண வாழ்க்கையோ, இருவரிடமும் பரஸ்பரம் புரிந்து கொள்ளுதலும், விட்டுக் கொடுத்தலும் இருந்தால், அந்த வாழ்க்கை வெற்றிகரமாகவும் மகிழ்ச்சியாகவும் அமையும்.

இவ்வாறு அவர் கூறினார்.