புதிய ஜனாதிபதி யார்?: ஆளும், எதிர்க்கட்சி கூட்டணி தீவிரம்

ஜனாதிபதி பிரதீபா பாட்டீலின் பதவிக் காலம் ஜூலை மாதத்துடன் முடிவடைகிறது. மீண்டும் ஜனாதிபதியாக அவருக்கு வாய்ப்பு இல்லை. இவருக்கு அடுத்து ஜனாதிபதி பதவிக்கு வரப்போகிறவர் ஆளும் கூட்டணியால் நிறுத்தப்படுவாரா? அல்லது எதிர்க்கட்சிகள் சார்பில் தேர்ந்தெடுக்கப்படுவாரா? என்ற விவாதங்கள் பரவலாக உள்ளன.

அடுத்த ஜனாதிபதி பதவிக்கு பலரின் பெயர்கள் அடிபடுகின்றன. ஜனாதிபதி வேட்பாளர் யார்? என்ற யூக விளையாட்டு காங்கிரஸ் வட்டாரத்தில் ஏற்கனவே தொடங்கிவிட்டது. பிரணாப் முகர்ஜி, பிரதமர் மன்மோகன் சிங், ராஜூவ் காந்தி குடும்ப நண்பர் ஒருவர் என பலரின் பெயர் பரிசீலனையில் இருப்பதாக தகவல்கள் வெளியாகின.

பாராளுமன்ற முன்னாள் இன்னாள் சபாநாயகர்களான மனோகர், சட்டர்ஜி, மீரா குமார், கோஷி, பி.ஏ.சவ்மா, சோம்நாத் மற்றும் ராஜ்ய சபா தலைவர் ஹமித் அன்சாரி ஆகியோரின் பெயரும் ஜனாதிபதி பதவிக்கு அடிபடுகிறது. ஜனாதிபதி பதவிக்கு பி.ஏ. சவ்மா போட்டியிடமாட்டார் என்று தேசியவாத காங்கிரஸ் நேற்று அறிவித்துவிட்டது. தேசிய ஜனநாயக கூட்டணி அப்துல் கலாமை ஜனாதிபதி வேட்பாளராக நிறுத்த ஆலோசித்து வருகிறது. இவரை நிறுத்தினால் பிற எதிர்க்கட்சிகளின் ஆதரவையும், ஆளும் கூட்டணியில் உள்ள சில கட்சிகளின் ஆதரவையும் பெறமுடியும் என பாரதீய ஜனதா தலைமையிலான தேசிய ஜனநாயக கூட்டணி (என்.டி.ஏ.) கணக்கு போட்டுள்ளது.

அப்துல் கலாம் நிறுத்தப்படும் பட்சத்தில் காங்கிரசுக்கு சிக்கல் ஏற்படுவது நிச்சயம். அப்துல் கலாம் இல்லாவிட்டாலும் காங்கிரஸ் கூட்டணிக்கு கடும் நெருக்கடியை கொடுக்க கூடிய வேட்பாளரை நிறுத்த வேண்டும் என்பதில் பாரதீய ஜனதா கூட்டணி தீவிரமாக உள்ளது. இக்கூட்டணி சார்பில் சிவசேனாவின் முக்கிய தலைவரான மனோகர் ஜோஷி ஜனாதிபதி பதவிக்கு நிறுத்தப்பட வாய்ப்பு இருக்கிறது. இவருக்கு பாரதீய ஜனதா தலைவர் நிதின் கட்காரியின் ஆதரவு உள்ளது. மராட்டியத்தில் சிவசேனா கூட்டணி ஆட்சி நடந்தபோது, நிதின் கட்காரி கேபினட் மந்திரியாக பதவி வகித்தார் என்பது குறிப்பிடத்தக்கது.