பாலாவோடு இணையும் சரத்குமார்

பாலா இயக்குகிற படங்கள் எல்லாம் அப்படங்களை தயாரிக்கும் தயாரிப்பாளர்களுக்கு லாபமா, இல்லையா என்ற கேள்விகளுக்குள் நுழைந்தால், அது பெரிய சர்ச்சையாகிவிடும். ஆனால் அவரது படங்கள் தமிழ்சினிமாவின் தவிர்க்க முடியாத அடையாளங்கள். எனவேதான் பாலா படத்தில் நடித்தால் போதும். அதுதான் டுட்டோரியல், காலேஜ், யுனிவர்சிடி என்றெல்லாம் மதி மயங்குகிறார்கள் முன்னணி நடிகர்கள் கூட.

ரொம்ப சீக்கிரம் பாலா படத்தில் நடிப்பேன் என்று கூறிவருகிறார் சீயான் விக்ரம். திரும்பவும் பாலாவுடன் ஒரு படத்தில் நடிக்க பிளான் போட்டுக் கொண்டிருக்கிறார் விஷால். ஆர்யாவோ, அண்ணன் என்னைக்கு அழைக்கிறாரோ அன்னைக்கு தண்ணி பார்ட்டிய்யா எல்லாருக்கும் என்று மெய் சிலிர்க்கிறார். இவர்களையெல்லாம் எதிர்பார்க்க வைத்தவிட்டு பாலா என்ன செய்து கொண்டிருக்கிறார்? விசாரித்தால் நமக்கே மெய்சிலிர்த்துப் போகிறது.

அடிப்படையில் ரொம்ப ஸ்லோவான பாலா, படு சுறுசுறுப்பாக தனது அடுத்த படத்தை ஆரம்பிக்க போகிறாராம். கடந்த சில வாரங்களுக்கு முன்பு இவரும் நடிகர் சரத்குமாரும் சந்தித்திருக்கிறார்கள். பெரிய கெட் அப் எதுவும் தேவையில்லை. நீங்க அப்படியே வந்தால் போதும். ரெண்டு நாள் தாடி மட்டும் முகத்தில் தெரிஞ்சா போதும் என்றும் கூறியிருக்கிறாராம். இப்படத்தில் மேலும் இரு இளைஞர்களை அறிமுகப்படுத்தும் திட்டம் இருக்கிறதாம் பாலாவுக்கு.

ஆலமரத்த புடிச்சு தொங்கு, காள மாட்டு வால புடிச்சு இழுன்னு என்னென்ன பயிற்சிகள் இருக்கிறதோ இளைஞர்களுக்கு. அய்யோ பாவம்...