விஜய் மல்லையாவுக்கு ஹர்பஜன் சிங் நோட்டீஸ்

விளம்பரத்தில் தன்னை அவமதித்தாக தொழிலதிபர் விஜய் மல்லையாவுக்கு கிரிக்கெட் வீரர் ஹர்பஜன் சிங் நோட்டீஸ் அனுப்பியுள்ளார்

.

ஹர்பஜன் சிங் குற்றம்சாட்டியுள்ள விளம்பரத்தில் இந்திய கிரிக்கெட் அணி கேப்டன் தோனி நடித்துள்ளார்.

விஜய் மல்லையாவின் மெக்டெவல்ஸ் நிறுவன விளம்பரத்தில் தோனியும், அதன் போட்டி நிறுவனமான ராயல் ஸ்டாக் விளம்பரத்தில் ஹர்பஜன் சிங்கும் தொலைக்காட்சியில் தோன்றுகின்றனர். இதில் ராயல் ஸ்டாக் விளம்பரத்தில் தோன்றும் ஹர்பஜனை, மெக்டெவல்ஸ் விளம்பரம் கிண்டல் செய்கிறது என்பது குற்றச்சாட்டு.

இது தொடர்பாக ஹர்பஜன் சிங்கின் வழக்கறிஞர்கள் கூறியுள்ளது: விஜய் மல்லையாவின் நிறுவன விளம்பரம், ஹர்பஜன் சிங்கை மட்டுமல்லாது அவரது குடும்பத்தையும், சீக்கிய சமுதாயத்தையும் அவமதிப்பது போல அமைத்துள்ளது. அந்த விளம்பரத்தை 3 நாள்களில் நிறுத்திக் கொள்ள வேண்டும், ஹர்பஜன் சிங் குடும்பத்தினரிடம் மன்னிப்பு கேட்க வேண்டுமென விஜய் மல்லையாவின் நிறுவனத்துக்கு நோட்டீஸ் அனுப்பியுள்ளோம்.

இதனால் தோனிக்கும், ஹர்பஜன் சிங்குக்கும் உள்ள உறவு பாதிக்கப்படாது என்று அவர்கள் தெரிவித்தனர்.

விஜய் மல்லையாவின் மெக்டெவல்ஸ் நிறுவன விளம்பரத்தில், ஹர்பஜன் சிங் போன்ற ஒருவர் அவரது தந்தையிடம் அடிவாங்குவது போலவும், அப்போது தோனி தோன்றி வசனம் பேசுவது போலவும் காட்சி அமைக்கப்பட்டுள்ளது.