மன்மோகன் கூட்டினால் வரி.. அதையே ஜெ. செய்தால் நிதியா?

‘மன்மோகன்சிங் கூட்டினால் வரி.. அதே வேலையை ஜெயலலிதா செய்தால் அதுமட்டும் நிதியா? கண்மூடித்தனமாக ஜெயலலிதாவை ஆதரிக்க கூடாது’ என்று கூறி கட்சிக்குள் தா.பாண்டியனுக்கு எதிர்ப்பு தெரிவித்துள்ளனர். இதுதொடர்பாக இந்திய கம்யூனிஸ்ட் கட்சியின் எட்டயபுரம் நகர செயலாளரும் தூத்துக்குடி மாவட்ட குழு உறுப்பினருமான குமரன் வெளியிட்டுள்ள அறிக்கை:கடந்த சில தினங்களுக்கு முன்பு தா.பாண்டியன் பேச்சு பத்திரிகையில் வெளியாகி இருந்தது. அதை படித்துவிட்டு யோசித்து கொண்டிருந்தபோது அவருடைய மறுப்பு செய்தி வந்தது.

தொடர்ந்து அவர் அளித்த பேட்டியும் வந்தது. அந்த பேட்டி என்னை போன்ற பல தொண்டர்களின் மனங்களை காயப்படுத்திவிட்டது. வலது சாரி கட்சிகளுடனான நமது கூட்டணி தேர்தலுக்காக மட்டும்தான். மற்ற காலங்களில் மக்கள் பிரச்னைகளுக்காக போராடும் கடமை நமக்குள்ளது. ஆனால், பாராளுமன்ற தேர்தல் நேரத்தில் தா.பாண்டியன் மீது கருணாநிதி வைத்த தனிநபர் விமர்சனம் போல் இவரும் தனிநபர் விமர்சனம், தனி நபர் பாராட்டு என்று அறிக்கை விடுவது சரியல்ல.

ஏற்கனவே விலைவாசி உயர்வு ஏழை மக்களை வாட்டி வதைக்கிறது. இந்த நேரத்தில் மாநில அரசு எந்தவித தயக்கமும் இன்றி அத்தியாவசிய பொருட்கள் உள்பட அனைத்து பொருட்கள் மீதும் ஆட்சிக்கு வந்த உடனே விலையை ஏற்றி உள்ளது. விலைவாசி உயர்வை கட்டுப்படுத்த வலியுறுத்தி இடதுசாரி கட்சிகள் மத்திய அரசுக்கு எதிராக போராட்டங்கள் நடத்தி வருகிறது. இந்த சூழ்நிலையில்  தமிழக அரசின் வரிவிதிப்பு கருணாநிதி ஆட்சிக் காலத்தில் வாங்கிய கடனை அடைப்பதற்காகத்தான் என வக்காலத்து வாங்கியதோடு, மேலும் கடனை அடைப்பதற்காக கருணாநிதிக்கும் வரி போட வேண்டும் என தா.பாண்டியன் பேசியிருப்பது வருத்தமளிக்கிறது.

பிரதமர் மன்மோகன்சிங் கூட்டினால் வரி, அதையே முதல்வர் ஜெயலலிதா செய்தால் நிதியா? தமிழக மாணவர்களின் கல்வி உரிமை கேள்விக்

குறியாகியிருக்கும் இந்த நேரத்தில் சமச்சீர் கல்விக்கு ஆரம்ப காலத்திலிருந்தே எதிர்ப்பு தெரிவித்துவரும் மெட்ரிக் பள்ளி நிர்வாகத்திடமே சமச்சீர் கல்வியை ஆய்வு செய்ய அரசு சொல்லியிருப்பது, ராஜபக்சே தலைமையில் தமிழ் ஈழ விடுதலையை ஆய்வு செய்ய சொல்வது போல் உள்ளது.

சமச்சீர்கல்வி குறித்த தங்களின் உறுதியான நிலைப்பாடு என்ன என்பதை கூற வேண்டும். தமிழக அரசு அளித்த விளக்கம் திருப்தி அளிப்பதாக உள்ளது என கூறியுள்ளீர்களே, அது உங்களுக்கா.. மாணவர்களுக்கா என்பதை விளக்கவேண்டும். 

இவ்வாறு குமரன் தனது அறிக்கையில் கூறியுள்ளார்.