தமிழை கொச்சைப்படுத்துவதா?- நடிகர் தனுசு மீது கவிஞர்கள் பாய்ச்சல்

எஸ். பாலன் இயக்கிய 'உடும்பன்' படத்தில் பாவேந்தர் பாரதிதாசனின் 5 பாடல்களும், பட்டுக்கோட்டை கல்யாண சுந்தரம் எழுதிய 2 பாடல்களும் இடம்பெற்றுள்ளன. இப்பாடல் சி.டி. வெளியீட்டு விழா வடபழனி பிரசாத் லேப்பில் நேற்று இரவு நடந்தது.

இதில் பாரதிதாசன் மகன் மன்னர் மன்னன், பட்டுக்கோட்டை கல்யாண சுந்தரம் மகன் குமாரவேலு ஆகியோர் பங்கேற்றனர். கவிஞர்கள் அப்துல் ரகுமான், புலமைபித்தன், நா.காமராசன், பொன்னடியான், பூவை செங்குட்டுவன், அறிவுமதி, பழனிபாரதி, நா.முத்துக்குமார், சினேகன், ஏகாதசி, நெல்லை ஜெயந்தா, ப்ரியன், அண்ணாமலை உள்ளிட்ட பலர் பங்கேற்றார்கள்.

அவர்கள் மேடையில் நினைவு பரிசு வழங்கி கவுரவிக்கப்பட்டார்கள். கவிஞர்கள் பேசும்போது, தனுஷ் பாடிய “ஒய் திஸ் கொலை வெறிடி” பாட்டை கண்டித்தனர்.

மன்னர்மன்னன் பேசும்போது, எனது தந்தை பாரதிதாசன், தமிழ் பண்பாட்டுக்கு விரோதமான செயல்பாடுகளை ஒருபோதும் அனுமதித்தது இல்லை. இன்றைக்கு ஆங்கிலம், தமிழ் கலந்து பாட்டு எழுதுகிறார்கள். அதுபோன்ற பாடலை மக்கள் உங்களிடம் விண்ணப்பம் போட்டு கேட்டார்களா? மக்கள் இந்த பாடல்களை விரும்புகிறார்கள் என்பது அப்பட்டமான பொய் என்றார்.

கவிஞர் அறிவுமதி பேசும்போது, 'கொலை வெறிடி பாட்டு மெட்டில் பஞ்சாப் உள்ளிட்ட பல மொழிகளில் பாடல்கள் வந்துள்ளது. யாழ்ப்பாணத்தை சேர்ந்த இளைஞர் என் தமிழ் மேல் உனக்கேனிந்த கொலை வெறி என்ற பாடலை அதே மெட்டில் உருவாக்கி 'யூ' டியூப்பில் வெளியிட்டு இருந்தார். அந்த பாடலை அதிலிருந்து அகற்றிவிட்டனர்' என்றார்.

தமிழையும், தமிழனையும் கொச்சைப்படுத்தும் பாடலாக கொலை வெறிடி பாடல் உள்ளது என்றார். அப்துல் ரகுமான் பேசும்போது, 'நல்ல பாடல்கள் வந்த காலம் போய் “ஒய் திஸ் கொலை வெறி” பாடல் காலமாகி விட்டது' என்றார்