ஈகோ இல்லை ! : கமல்

தனது மாஸ் ஹீரோ இமேஜ் விட்டு விஜய் நடித்து இருக்கும் படம் 'நண்பன்'. இப்படம் மக்களிடையே வரவேற்பை பெற்று இருப்பது விஜய்யை சந்தோஷத்தில் ஆழ்த்தி இருக்கிறது.

தன் 'விஸ்வரூபம்' பட பணிகளில் மும்முரமாக இருந்த கமல்ஹாசன் பார்ப்பதற்கென்று 'நண்பன்' படத்தின் பிரத்யேக காட்சியை ஏற்பாடு செய்தார் விஜய். கமல் தனது குடும்பத்தினருடன் சனிக்கிழமை  (ஜன 21 ) இரவு 'நண்பன்' திரைப்படத்தைப் பார்த்தார்.

நண்பன் படத்தினை பார்த்துவிட்டு படக்குழுவினரையும் விஜய்யையும் வெகுவாக பாராட்டினார் கமல்.

' நண்பன்' படம் குறித்து கமல்  " விஜய், ஷங்கர், படத்தின் தயாரிப்பாளர் அனைவருக்கும் எனது பாராட்டுக்கள்.

ஒரு பெரிய நடிகர் செய்த படத்தினை ரீமேக் செய்யும் போது, ஒரு COMPARSION வரும். அப்படி செய்து இருக்கலாம், இப்படி செய்து இருக்கலாம் என்று கூறுவார்கள்.

நான் ' 3 இடியட்ஸ்'  படத்தினை  சில பகுதிகள் மட்டும் தான் பார்த்தேன். விஜய் தனக்கு ஏற்றது போல் பாத்திரத்தை மாற்றிக் கொண்டது எனக்கு மிகவும் பிடித்து இருந்தது. இது ஷங்கர், விஜய் என இருவரின் முயற்சி. அவர்களின் முயற்சிக்கு நல்ல களம் அமைத்து கொடுத்த தயாரிப்பாளருக்கு என் வாழ்த்துக்கள்.

விஜய்யுடன் நண்பர்களாக நடித்து இருப்பவர்கள், நல்ல நட்பை பார்த்த சந்தோஷத்தை ஏற்படுத்துகிறார்கள். நான் தான் நாயகன் என்ற ஈகோ படத்தில் தெரியவே இல்லை.

நிறைய MULTI STARRER படங்கள் வர வேண்டும் என்பது எனது ஆசை. அதற்கான ஆரம்பமாக 'நண்பன்' படம் இருக்கும். மக்களும் இப்படத்திற்கு ஆதரவு தருவார்கள் என்று நம்புகிறேன். " என்று தெரிவித்துள்ளார்.