அதே சமயத்தில் துணை ஜனாதிபதி ஹமித் அன்சாரி பெயரும் காங்கிரஸ் தலைவர் சோனியா பரிசீலனையில் உள்ளது. கடந்த வாரம் டெல்லியில் நிகழ்ந்த அரசியல் நிகழ்வுகளால் பிரணாப் முகர்ஜிதான் அடுத்த ஜனாதிபதி ஆவார் என்று பேசப்பட்டது. தி.மு.க., தேசியவாத காங்கிரஸ், சமாஜ்வாடி, பகுஜன் சமாஜ் கட்சி மற்றும் இடதுசாரிகள் பிரணாப் முகர்ஜிக்கு ஆதரவாக இருப்பதாக தகவல்கள் வெளியானது. இந்த நிலையில் காங்கிரசின் பரிசீலனையில் உள்ள பிரணாப் முகர்ஜி, ஹமித் அன்சாரி இருவருக்குமே எதிர்பாராத திடீர் பின்னடைவு ஏற்பட்டுள்ளது.
பிரணாப் முகர்ஜிக்கு ஆதரவு கொடுப்பதாக கூறி வந்த முலாயம்சிங் யாதவ் திடீரென மனம் மாறியுள்ளார். அவர் ஹிமீத் அன்சாரியை ஜனாதிபதியாக்க வேண்டும் என்று கூறுவதாக தெரிகிறது. ஆனால் அன்சாரியை ஆதரிக்க இயலாது என்று இடதுசாரிகள் திட்டவட்டமாக அறிவித்துள்ளனர்.
காங்கிரஸ் சார்பில் வேட்பாளர் பெயர் அறிவிக்கப்பட்ட பிறகு முடிவை வெளியிடுவோம் என்று இடது சாரிகள் அறிவித்துள்ளனர். பிரணாப் முகர்ஜியை வேட்பாளராக நிறுத்தினால் மண்ணின் மைந்தர் என்ற கொள்கைப்படி மம்தா பானர்ஜி ஆதரித்து விடுவார் என்று காங்கிரஸ் கருதியது. ஆனால் மம்தா பானர்ஜி, மேற்கு மாநில அரசுக்கு உள்ள ரூ. 21 ஆயிரம் கோடி கடன் மற்றும் வட்டி சுமையை மத்திய அரசு தள்ளுபடி செய்ய வேண்டும். இதற்கு மத்திய அரசு சம்மதித்தால் பிரணாப் முகர்ஜியை ஆதரிக்க தயார் என்று கூறியுள்ளார். மம்தா பானர்ஜியின் இந்த மிரட்டல் காங்கிரஸ் மூத்த தலைவர்களிடம் கடும் அதிருப்தியை ஏற்படுத்தி உள்ளது.
மம்தாவின் நிபந்தனை ஏற்றுக்கொள்ள இயலாதபடி இருப்பதால், அவர் காங்கிரசுக்கு எதிரான நிலைப்பாட்டை எடுக்கக் கூடும் என்று சந்தேகிக்கப்படுகிறது. சமாஜ்வாதி, திரிணாமுல் காங்கிரஸ், இடதுசாரிகள் எழுப்பியுள்ள திடீர் முட்டுக்கட்டைகளால் சோனியா சோர்வடைந்துள்ளார்.
எனவே பிரதமர் மன்மோகன்சிங் ரியோ மாநாட்டை முடித்து விட்டு 23-ந்தேதி திரும்பி வந்த பிறகு இதில் இறுதி முடிவு எடுக்கலாம் என்று சோனியா தீர்மானித்துள்ளதாக கூறப்படுகிறது. இதற்கிடையே அ.தி.மு.க.வும், பிஜு ஜனதா தளமும் நிறுத்தியுள்ள சங்மா, தொடர்ந்து தனக்கு ஆதரவு திரட்டும் பணிகளில் ஈடுபட்டுள்ளார். ஆனால் பிரதான எதிர்க்கட்சியான பாரதீய ஜனதா ஜனாதிபதி வேட்பாளர் தேர்வு தொடர்பாக இன்னமும் மவுனமாக உள்ளது.
காங்கிரஸ் வேட்பாளர் அறிவிக்கப்பட்ட பிறகு இதில் ஒரு முடிவை எடுக்கலாம் என்று பா.ஜ.க. தலைவர்கள் காத்திருக்கிறார்கள். மாநில கட்சிகள் மற்றும் ஆதரவு தரும் சில கட்சிகளின் மறைமுக மிரட்டலால் அதிர்ச்சி அடைந்துள்ள காங்கிரஸ் கட்சி, பாரதீய ஜனதாவுடன் சுமூகமாக பேசி ஜனாதிபதி வேட்பாளரை ஒருமித்த கருத்துடன் தேர்வு செய்யலாமா? என்று ஆலோசித்து வருகிறது.
பா.ஜ.க. தலைவர்களில் ஒரு தரப்பினர் இதற்கு தயாராக உள்ளனர். ஆனால் ஆகஸ்டு மாதம் நடக்கும் துணை ஜனாதிபதி தேர்தலின் போது முரளி மனோகர் ஜோஷியை தேர்ந்தெடுக்க வேண்டும் என்று பா.ஜ.க. தலைவர்கள் கூறியுள்ளனர். இதை ஏற்க காங்கிரசில் தயக்கம் நிலவுகிறது. இத்தகைய குழப்பமான சூழ்நிலையில் ஜனாதிபதி வேட்பாளர் குறித்து டெல்லியில் தொடர்ந்து பரபரப்பான ரகசிய பேச்சுவார்த்தைகள் நடந்து வருகிறது.
No comments:
Post a Comment