காதலர் தினத்தில் புதுசு! பிரபுதேவா முடிவு!!

காதலில் இருந்து தனது கவனத்தை வேறு பக்கம் திருப்பியிருக்கும் நடிகர் பிரபுதேவா, காதலர் தினத்தில் புதிய இசை ஆல்பத்தின் ஆடியோவை வெளியிட முடிவு செய்திருக்கிறாராம். நயன்தாராவுடனான காதல் முறிவு குறித்த செய்திகள் பத்திரிகைகளில் தொடர்ந்து வெளியாகி வந்தாலும், அதைப்பற்றியெல்லாம் கவலைப்படாமல், ஒரு இயக்குனராக, ரவுடி ரத்தோர் என்ற இந்திப்படத்தில் பிஸியாக இருக்கிறார் பிரபுதேவா.

அதேநேரம் தனது நீண்ட கால கனவான இசை ஆல்பம் தயாரிக்கும் வேலைகளிலும் மும்முரம் காட்டி வருகிறாராம் மாஸ்டர். சமீபகாலங்களில் தனக்கு கிடைத்த ஓய்வு நேரத்தை இசை ஆல்பம் உருவாக்குவதற்கு பயன்படுத்திக் கொண்ட பிரபுதேவா, மிகவும் வித்தியாசமான ஐந்து பாடல்களுடன் கூடிய ஒரு ஆல்பத்தை உருவாக்கியிருக்கிறார். இசை ஆல்பப் பணிகள் கிட்டத்தட்ட இறுதிகட்டத்தை எட்டியுள்ள நிலையில், அந்த ஐந்து பாடல்களையுமே வீடியோவாக படம்பிடிக்க முடிவு செய்திருக்கிறாராம்.

இசை ஆல்பத்தில் இடம்பெற்றுள்ள பாடல்களை பிரபலப்படுத்தும் வகையில் முதலில் ஆடியோவை மட்டும் காதலர் தினத்தன்று ரிலீஸ் செய்துவிட்டு, விஷுவல்களை மார்ச்சில் வெளியிட முடிவு செய்திருக்கிறாராம் மாஸ்டர்.