புதுக்கோட்டை இடைத்தேர்தல்: நாளை ஓட்டு எண்ணிக்கை

புதுக்கோட்டை தொகுதி இடைத்தேர்தல் கடந்த 12-ந் தேதி நடந்தது. இதில் 73.48 சத வீதம் வாக்குகள் பதிவானது. அதாவது ஆண்கள் 69,259 பேரும், பெண்கள் 74,018 பேரும் சேர்த்து மொத்தம் 1 லட்சத்து 43 ஆயிரத்து 277 பேர் வாக்களித்துள்ளனர். யாருக்கும் வாக்களிக்க விரும்பவில்லை என்பதை குறிக்கும் “49 ஓ” படிவத்தை 47 பேர் பயன்படுத்தி உள்ளனர். 

வாக்குப்பதிவு எந்திரங்கள் அனைத்தும் “சீல்” வைக்கப்பட்டு புதுக்கோட்டை அரசு மகளிர் கல்லூரியில் வைக்கப்பட்டுள்ளது. அங்கு 4 அடுக்கு பாதுகாப்பு போடப்பட்டுள்ளது. துப்பாக்கி ஏந்திய எல்லைப்பாதுகாப்பு படையினர் மற்றும் போலீசார் நிறுத்தப்பட்டு உள்ளனர். நாளை (15-ந்தேதி) காலை 8 மணிக்கு ஓட்டு எண்ணிக்கை தொடங்குகிறது. ஓட்டு எண்ணும் பணியில் 200 ஊழியர்கள் ஈடுபடுத்தப்படுகிறார்கள். 

ஓட்டு எண்ணும் மையத்தில் 10 மேஜைகள் போடப்படுகிறது. மொத்தம் 23 சுற்றுக்களாக ஓட்டுக்கள் எண்ணப்படுகிறது. புதுக்கோட்டை தொகுதியில் அ.தி.மு.க. சார்பில் கார்த்திக் தொண்டைமான், தே.மு.தி.க. சார்பில் ஜாகீர்உசேன், இந்திய ஜனநாயக கட்சி சார்பில் சீனிவாசன் மற்றும் சுயேட்சைகள் உள்பட 20 பேர் போட்டியிடுகிறார்கள். இதில் வெற்றி யாருக்கு என்பது பிற்பகல் 1 மணிக்கு தெரிந்துவிடும்.