இலங்கை இனப்படுகொலையை கண்டுகொள்ளாததை கண்டித்து ஜனாதிபதி தேர்தலை புறக்கணிக்கிறோம்: தே.மு.தி.க

மத்திய அரசைக் கண்டித்து ஜனாதிபதி தேர்தலை புறக்கணிக்கப் போவதாக தே.மு.தி.க தலைவர் விஜயகாந்த் அறிவித்துள்ளார். ஜனாதிபதி பிரதீபா பாட்டீலின் பதவிக்காலம் ஜூலை மாதத்துடன் நிறைவடைவதால் புதிய ஜனாதிபதியைத் தேர்ந்தெடுப்பது தொடர்பாக அரசியல் கட்சிகள் தீவிர ஆலோசனையில் ஈடுபட்டுள்ளன. 

ஐக்கிய முற்போக்கு கூட்டணி சார்பில் பிரணாப் முகர்ஜி ஜனாதிபதி வேட்பாளராக அறிவிக்கப்பட்டுள்ளார். அ.தி.மு.க மற்றும் பிஜூ ஜனதாதளம் கட்சிகள் முன்னாள் சபாநாயகர் பி.ஏ.சங்மாவை வேட்பாளராக நிறுத்தியுள்ளன. தேசிய ஜனநாயகக் கூட்டணி, இடதுசாரிக் கட்சிகள் ஜனாதிபதி தேர்தல் விவகாரத்தில் இன்னும் முடிவெடுக்கவில்லை. திரிணாமூல் காங்கிரசால் வேட்பாளராக அறிவிக்கப்பட்ட அப்துல்கலாம், தான் தேர்தலில் போட்டியிடப் போவதில்லை என அறிவித்துள்ளார். 

இந்நிலையில் மத்திய அரசின் மெத்தனப் போக்கை கண்டித்து ஜனாதிபதி தேர்தலை புறக்கணிக்க உள்ளதாக தே.மு.தி.க தலைவர் விஜயகாந்த் கூறியுள்ளார். இதுபற்றி பேசிய விஜயகாந்த், ‘இலங்கையில் நடந்த இனப்படுகொலைகளை இந்திய அரசு கண்டுகொள்ளவில்லை. அதேபோல் காவிரியில் தண்ணீர் திறந்துவிட மறுக்கும் கர்நாடக அரசையும், மத்திய அரசு கண்டிக்கவில்லை. எனவே மத்திய அரசின் இப்போக்கைக் கண்டித்து ஜனாதிபதி தேர்தலை தே.மு.தி.க புறக்கணிக்கிறது’ என விஜயகாந்த் கூறியுள்ளார்.