தீவிரவாதி கசாப் ஜெயில் வளாகத்தில் உலாவ அனுமதி

கடந்த 2008-ம் ஆண்டு நவம்பர் 26-ந்தேதி பாகிஸ் தான் தீவிரவாதிகள் மும்பையில் ஊடுருவி தாக்குதல் நடத்தினார்கள். அப்போது தாக்குதலில் ஈடுபட்ட தீவிரவாதி அஜ்மல் கசாப் (24) என்பவன் மட்டும் அதிரடிப்படையினரிடம் உயிருடன் சிக்கினான். மற்றவர்கள் சுட்டுக்கொல்லப்பட்டனர்.

 

கசாப் மீது மும்பை சிறப்பு கோர்ட்டில் வழக்கு தொடரப்பட்டு தூக்கு தண்டனை விதிக்கப்பட்டது. அதைத்தொடர்ந்து அவன் மும்பை மத்திய சிறையில் அடைக்கப்பட்டு இருக்கிறான். அவனது நம்பர் சி-7096.

 

தூக்கு தண்டனை கைதியான அவன் சிறையில் உள்ள தனி அறையில் அடைக்கப்பட்டுள்ளான். இதனால் அவனுக்கு மன ரீதியாகவும், உடல் ரீதியாகவும் பாதிப்பு ஏற்படும் சூழ்நிலை உருவானது. எனவே தன்னை சிறை அறைக்கு வெளியே வளாகத்தில் உலாவ அனுமதி வழங்கும்படி சிறைத்துறை அதிகாரிகளிடம் கசாப் கோரியிருந்தான்.

 

அவனது கோரிக்கையை பரிசீலித்த சிறைத்துறை நிர்வாகம் அவன் சிறை அறைக்கு வெளியே தினமும் 1 மணி நேரம் உலாவ அனுமதி வழங்கியது. இதன் மூலம் சுத்தமான காற்று மற்றும் சூரிய வெளிச்சம் அவனுக்கு கிடைக்கும். அதனால் அவனது உடல்நலம் மேம்படும் என சிறைத்துறை அதிகாரிகள் தெரிவித்தனர்.

 

பொதுவாக சிறை கைதிகளுக்கு தச்சு வேலை, கைத்தறி, சமையல், தையல், ஷு தயாரிப்பது போன்ற பணிகள் வழங்கப்படும். தூக்கு தண்டனை கைதி என்பதால் கசாப்புக்கு இது போன்ற வேலைகள் எதுவும் வழங்கவில்லை.