சென்னையில் அடித்த சதமே சிறந்தது: தெண்டுல்கர்

சர்வதேச கிரிக்கெட்டில் தெண்டுல்கர் 100 சதம் அடித்து புதிய வரலாறு படைத்தார். இதில் 2008-ம் ஆண்டு மும்பை தாக்குதலுக்கு பிறகு சென்னையில் அடித்த சதமே தனக்கு சிறந்தது என்று தெண்டுல்கர் கூறியுள்ளார். இதுதொடர்பாக துபாயில் நடந்த நிகழ்ச்சி ஒன்றில் அவர் கூறியதாவது:- 

நான் அடித்த 100 சதங்களில் 2008-ம் ஆண்டு இங்கிலாந்துக்கு எதிராக சென்னையில் அடித்ததே மிகவும் சிறந்தது. மும்பை தாக்குதல் சம்பவத்துக்கு பிறகு வெளிநாட்டு அணியுடன் மோதிய முதல் டெஸ்டில் 103 ரன்கள் எடுத்து அணியை வெற்றி பெற வைத்து அந்த சதத்தை மும்பை தாக்குதலில் இறந்தவர்களுக்காக சமர்ப்பித்தேன். இதுவே மறக்க முடியாத சிறந்த சதமாகும். 

இதேபோல் 1992-ல் பெர்த்தில் அடித்த சதமும் மறக்க இயலாது. நான் சிறிய வயதில் டென்னிஸ் வீரர் ஜான் மெக்கனரோ மாதிரி வர வேண்டும் என்று ஆசைப்பட்டேன். ஆனால் அது நடக்க வில்லை. 

நான் வளர்ந்து கொண்டு இருந்த காலத்தில் கவாஸ்கர்தான் எனக்கு ரோல்மாடல். இதேபோல விவியன் ரிச்சர்ட்சும் எனக்கு முன்மாதிரிதான். மனைவியையும், கிரிக்கெட்டையும் நான் மிகவும் நேசிக்கிறேன். 

இவ்வாறு தெண்டுல்கர் கூறியுள்ளார்