அருணாவை கருணை கொலை செய்ய உச்ச நீதிமன்றம் அனுமதி அளிக்குமா?

கடந்த 36 ஆண்டுகளாக கோமாவில் இருக்கும் நர்ஸ் அருணா ஷான்பாக்கை கருணை கொலை செய்ய அனுமதி கோரும் வழக்கில் உச்ச நீதிமன்றம் தேதி குறிப்பிடாமல் தீர்ப்பை ஒத்தி வைத்தது.

மும்பை பரேலில் உள்ள கே.இ.எம். மருத்துவமனையில் 1966ம் ஆண்டு நர்சாக வேலைக்கு சேர்ந்தவர் அருணா ஷான்பாக். நோயாளிகளை இன்முகத்துடன் கவனித்து வந்த அருணாவின் வாழ்க்கையை தலைகீழாக புரட்டி போட்ட துயர சம்பவம், அவர் வேலைக்கு சேர்ந்த 7ம் ஆண்டில் நடந்தது.

1973, நவம்பர் 27ம் தேதி இதே மருத்துவமனையில் வார்டு பாயாக வேலை செய்த சோகன்லால் பார்த்தா வால்மீகி, அருணாவை இரவுப் பணியின் போது பாலியல் பலாத்காரம் செய்தான். அப்போது, அவருடைய கழுத்தை நாய் சங்கிலியால் சுற்றி இறுக்கினான்.

இந்த அதிர்ச்சியால் கோமா நிலைக்கு சென்ற அருணா, கடந்த 36 ஆண்டுகளாக இதே மருத்துவமனையில் ஜடமாக கிடக்கிறார்.

இப்போது அவருக்கு 59 வயது. மருத்துவமனை நர்சுகள் அவரை இத்தனை ஆண்டுகளாக சலிக்காமல் மிகவும் கவனத்துடன் பராமரித்து வருகின்றனர்.

அருணாவின் நிலையை கண்டு பரிதாபப்பட்ட பிங்கி விரானி என்ற சமூக சேவகி, அருணாவை கருணை கொலை செய்ய அனுமதி கோரும்மனுவை உச்ச நீதிமன்றத்தில் தாக்கல் செய்தார்.

‘அருணாவால் பார்க்கவோ, பேசவோ முடியாது. இப்படி அவரை உயிருடன் வைத்திருப்பது கவுரவமாக வாழ்வதற்கு அவருக்கு உள்ள உரிமையை மீறுவதாகும். எனவே, அவருக்கு உணவு அளிப்பதை நிறுத்தும்படி கே.இ.எம். மருத்துவமனைக்கு உத்தரவிட வேண்டும். அவர் இறப்பதற்கு அனுமதிக்க வேண்டும்’ என்று மனுவில் பிங்கி கூறியுள்ளார்.

இதற்கு பதில் அளிக்கும்படி மத்திய அரசுக்கும், மகாராஷ்டிரா அரசுக்கும் உச்ச நீதிமன்றம் நோட்டீஸ் அனுப்பியது.

இந்த வழக்கு நேற்று விசாரணைக்கு வந்தபோது மத்திய அரசு சார்பில் வாதிட்ட சொலிசிட்டர் ஜெனரல் வாஹன்வதி, “கோமாவில் இருக்கும் அருணாவை கருணை கொலை செய்ய அனுமதிக்க முடியாது.

இந்த வழக்கில் நன்னெறி, நியாயம், தர்மம் போன்ற பிரச்சனைகள் இருக்கின்றன” என்றார். இருதரப்பு வாதங்களை கேட்ட நீதிபதிகள், தீர்ப்பை தேதி குறிப்பிடாமல் ஒத்திவைத்தனர்.