மெக்ஸிகோ நாட்டில் உள்ள லா காபோஸ் நகரில், ஜி-20 மாநாடு விரைவில் நடைபெற இருக்கிறது. இம்மாநாட்டில் இந்தியப் பிரதமர் மன்மோகன்சிங் கலந்து கொள்வது மட்டுமின்றி அமெரிக்க அதிபர் பராக் ஒபாமா உள்ளிட்ட பல்வேறு நாட்டுத் தலைவர்களை சந்தித்து பேச்சு வார்த்தை நடத்த உள்ளார். அப்போது இலங்கை அதிபர் ராஜபக்சேவையும் பிரதமர் மன்மோகன் சிங் சந்திக்க இருக்கிறார்.
இம்மாநாட்டில் கலந்து கொள்ளும் அனைத்து தலைவர்களையும் மன்மோகன் சிங் சந்திக்கும் நிகழ்ச்சி நிரலில் இலங்கை அதிபரின் பெயரும் இடம் பெற்று உள்ளதாக இலங்கையிலிருந்து வரும் தகவல்கள் தெரிவிக்கின்றன.
ஜெனீவாவில் அமைந்துள்ள ஐ.நா. மனித உரிமைகள் ஆணையத்தில் இந்த ஆண்டு தொடக்கத்தில் நடைபெற்ற ஓட்டெடுப்பில் இலங்கைக்கு எதிராக இந்தியா ஓட்டு அளித்தது. இதனால் இருநாடுகளுக்கிடையேயான உறவில் விரிசல் ஏற்பட்டிருப்பதாக சர்வதேச அரசியல் நிபுணர்கள் கருத்து தெரிவித்திருந்தனர்.
இந்நிலையில் இருவரும் சந்தித்துக் கொள்வது முக்கியத்துவம் வாய்ந்ததாக அமைகிறது. இருநாடுகளுக்கிடையேயான உறவுகள் குறித்து விவாதிப்பார்கள் எனத் தெரிகிறது.
No comments:
Post a Comment