பெருந்துறை பகுதியில் உள்ள பண்ணை வீட்டில் நித்யானந்தா பதுங்கல்?

மதுரை ஆதீனமாக நியமிக்கப்பட்டதில் இருந்து தமிழ்நாட்டில் நித்யானந்தாவுக்கு எதிராக பல்வேறு எதிர்ப்புகள் கிளம்பி வருகிறது. இதற்கிடையே பெங்களூர் பிடதி ஆசிரமத்தில் நடந்த நிகழ்ச்சியில் நித்யானந்தா சீடர்களுக்கும் மற்றும் கன்னட அமைப்பைச் சேர்ந்தவர்களுக்கும் ஏற்பட்ட கைகலப்பு சம்பவம் பெரும் பரபரப்பை ஏற்படுத்தி உள்ளது.

 

இந்த மோதல் தொடர்பாக இருதரப்பினர் மீதும் பெங்களூர் போலீசார் வழக்குப்பதிவு செய்துள்ளனர். இந்த சம்பவத்தையொட்டி பெங்களூர் ஆசிரமத்துக்கு சீல் வைக்கப்பட்டது. நித்யானந்தாவின் தியான பீடத்தை கையகப்படுத்தும் அதிரடி நடவடிக்கையிலும் கர்நாடக அரசு இறங்கி உள்ளது. மேலும் நித்யானந்தாவை கைது செய்யவும் உத்தரவிடப்பட்டு உள்ளது. இது மேலும் பரபரப்பை ஏற்படுத்தி உள்ளது.

 

மதுரை ஆதினத்தில் ரஞ்சிதா ஆபாச நடனமாடியதாக இந்து மக்கள் கட்சியின் மதுரை மாவட்ட தலைவர் கோவை கண்ணன் மதுரை ஐகோர்ட்டு கிளையில் மனுதாக்கல் செய்தார். அந்த மனுவில், ``ஆதீன மடத்தின் மாடியில் நடந்த பஜனையில் என்னை அழைத்தனர். மதுரை ஆதினம் அருணகிரிநாதர், நடிகை ரஞ்சிதா, வைஷ்ணவி மற்றும் சீடர்கள் இருந்தார்கள்.

 

சீடர்கள் புனிதநீர் என்று கூறி ஒரு டம்ளரில் தண்ணீர் கொடுத்தனர். அதை குடித்த அனைவரும் மயக்க நிலையில் இருந்தனர். மயக்க நிலையில் இருந்த நடிகை ரஞ்சிதா நித்யானந்தா அருகில் நடனமாடி கொண்டிருந்தார். மற்ற சீடர்கள் அருவெறுக்கத்தக்க நிலையில் நடந்து கொண்டனர். மதுரை ஆதின மடத்தை களங்கப்படுத்தும் வகையில் நடக்கும் இந்த ஆபாச நடனத்தை தடுக்க வேண்டும்'' என்று கூறி இருந்தார்.

 

இந்த மனு மீது விசாரணை நடத்தவும், நித்யானந்தா, நடிகை ரஞ்சிதா ஆகியோர் இந்த புகார் தொடர்பாக பதில் அளிக்க வேண்டும் எனவும் மதுரை ஐகோர்ட்டு கிளை நோட்டீசு விடுத்தது. ஒருபுறம் கர்நாடக அரசு நித்யானந்தாவை கைது செய்ய எடுத்த நடவடிக்கை மறுபுறம் ரஞ்சிதா ஆபாச நடனம் தொடர்பாக மதுரை ஐகோர்ட்டு நித்யானந்தா மற்றும் ரஞ்சிதாவுக்கு நோட்டீசு அனுப்பி விடுத்த உத்தரவு இந்த 2 சம்பவத்தை தொடர்ந்து நித்யானந்தா திடீர் தலைமறைவாகி விட்டார்.

 

இப்போது அவர் எங்கே இருக்கிறார்? எப்போது வெளியே வருவார்? என்று புதிராக உள்ளது. இந்த நிலையில் நித்யானந்தா ஈரோடு மாவட்டம் பெருந்துறை பகுதியில் அவருக்கு நெருக்கமான நண்பரின் பண்ணை வீட்டில் பதுங்கி இருப்பதாக ரகசிய தகவல் கிடைத்துள்ளது.

 

பெருந்துறை அருகே உள்ள பல்லகவுண்டன் பாளையத்தில் நித்யானந்தாவின் முக்கிய சீடர்களில் ஒரு சீடரின் நண்பர் வீடு அங்கு இருப்பதாகவும் அந்த வீட்டில் நித்யானந்தா ரகசிய அறையில் தங்கி இருப்பதாகவும் அப்பகுதியில் பரபரப்பாக பேசப்படுகிறது. அப்பகுதியில் உள்ள பொதுமக்கள் மற்றும் குழந்தைகள் கூறும்போது, இங்கு 3 கார்கள் வந்தது.

 

அந்த கார்களில் ஒரு சாமியாரும் மற்றும் அவரை தொடர்ந்து நீண்ட முடியுடன் சீடர்களும் இறங்கி சென்றதை பார்த்தோம் என்றும் கூறினர். இதையொட்டி அப்பகுதியில் நித்யானந்தா பதுங்கி இருப்பது கிட்டத்தட்ட ஊர்ஜிதமாகி உள்ளது. கர்நாடக அரசு மற்றும் மதுரை ஐகோர்ட்டு கிளையும் தனக்கு எதிராக எடுத்துள்ள நடவடிக்கையில் இருந்து எப்படி தப்பிப்பது என்பது குறித்து சீடர்களுடன் நித்யானந்தா ஆலோசனை நடத்தி வருவதாகவும் கூறப்படுகிறது.

 

இந்த நிலையில் ஈரோடு மாவட்ட போலீஸ் சூப்பிரண்டு பொன்னியிடம் இன்று தொடர்பு கொண்டு கேட்டபோது, ``கர்நாடக போலீசில் இருந்து எங்களுக்கு எந்த தகவலும் இல்லை. அவர்களும் இங்கு வரவில்லை. கர்நாடக போலீசார் இங்கு வந்தால் அங்குள்ள போலீஸ் சூப்பிரண்டு என்னிடம் தகவல் தெரிவிப்பார். அவர்கள் கேட்டுக் கொண்டால் கர்நாடக போலீசாருக்கு தேவையான உதவிகளை செய்வோம்''

 

என்று கூறினார்.