புதுக்கோட்டை சட்டமன்ற தொகுதி இந்திய கம்யூனிஸ்டு கட்சி உறுப்பினர் முத்துக்குமரன் கடந்த ஏப்ரல் மாதம் 1-ந்தேதி கார் விபத்தில் மரணம் அடைந்தார்.
இதையடுத்து காலியாக இருந்த இந்த தொகுதிக்கு இன்று இடைத் தேர்தல் நடக்கிறது. இதில் அ.தி.மு.க. சார்பில் கார்த்திக் தொண்டைமான், தே.மு.தி.க. சார்பில் ஜாகீர் உசேன், இந்திய ஜனநாயக கட்சி சார்பில் சீனிவாசன் உள்பட 20 பேர் போட்டியிடுகின்றனர். தி.மு.க., ம.தி.மு.க., பா.ம.க., இந்திய கம்யூனிஸ்டு உள்ளிட்ட கட்சிகள் போட்டியிடாததால் அ.தி.மு.க., தே.மு. தி.க. இடையே நேரடி போட்டி ஏற்பட்டுள்ளது.
அ.தி.மு.க. வேட்பாளரை ஆதரித்து முதல்-அமைச்சர் ஜெயலலிதா கடந்த 9-ந்தேதி சூறவாவளி பிரசாரம் செய்தார். மேலும் 32 அமைச்சர்கள், லட்சிய தி.மு.க. தலைவர் டி.ராஜேந்தர், புதிய தமிழகம் கட்சி தலைவர் டாக்டர் கிருஷ்ணசாமி, நடிகர், நடிகைகள் ஆதரவு திரட்டினர்.
தே.மு.தி.க. வேட்பாளரை ஆதரித்து கட்சி தலைவர் விஜயகாந்த், அவரது மனைவி பிரேமலதா, மார்க்சிஸ்ட் கம்யூனிஸ்டு கட்சியினர் பிரசாரம் செய்தனர். 10 நாட்களுக்கும் மேலாக நடந்த பிரசாரம் 10-ந்தேதி மாலையுடன் முடிந்தது.
இதையடுத்து தேர்தல் நாளான இன்று காலை 8 மணிக்கு ஓட்டுப்பதிவு தொடங்கியது. முன்னதாக காலை 7.30 மணிக்கு மாதிரி வாக்குப்பதிவு நடைபெற்றது. மொத்தம் 224 வாக்குச் சாவடிகள் அமைக்கப்பட்டிருந்தன. அனைத்து வாக்குச்சாவடிகளும் பதட்டமானவையாக அறிவிக்கப்பட்டுள்ளது.
இதில் மிகவும் பதட்டமான 37 வாக்குச்சாவடிகளுக்கு மத்திய அரசுப் பணியில் உள்ள நுண் பார்வையாளர்கள் நியமிக்கப்பட்டு இருந்தனர். வாக்குச்சாவடி அலுவலர்கள் நேற்று பிற்பகலிலேயே அந்தந்த மையங்களுக்கு சென்றனர். ஒரு சாவடிக்கு 2 மின்னணு எந்திரங்கள், கட்டுப்பாட்டு கருவி, அடை யாள `மை' உள்ளிட்ட 108 பொருட்கள் வழங்கப்பட்டன.
ஆண்கள் 97,371 பேர், பெண்கள் 97,604 பேர், இதர வாக்காளர்கள் 5 பேர் என மொத்தம் 1,94,980 பேர் வாக்களிக்கிறார்கள். காலை 8 மணிக்கு ஓட்டுப் பதிவு தொடங்கும் முன்பே புதுக்கோட்டை நகர் பகுதியில் உள்ள பெரும்பாலான வாக்குச்சாவடிகளில் ஆண், பெண் வாக்காளர்கள் நீண்ட வரிசையில் காத்திருந்தனர்.
ஓட்டுப்பதிவு தொடங்கியதும் அவர்கள் வரிசையில் சென்று வாக்களித்தனர். இதேபோல் புறநகர் பகுதியில் மந்தமாக தொடங்கிய வாக்குப்பதிவு 9 மணிக்கு மேல் விறு, விறுப்படைந்தது.
குறிப்பாக முதன் முதலாக வாக்களிக்கும் இளம் வாக்காளர்கள் ஆர்வத்துடன் வந்து தங்கள் ஜனநாயக கடமையான வாக்கினை பதிவு செய்தனர். அவர்களுக்கு விரலில் அடையாள `மை' வைக்கப்பட்டது.
அ.தி.மு.க. வேட்பாளர் கார்த்திக் தொண்டைமான் புதுக்கோட்டை அரசு மகளிர் கல்லூரியில் அமைக்கப்பட்டிருந்த வாக்குச் சாவடியில் காலை 8 மணிக்கு தனது வாக்கினை பதிவு செய்தார். இதே போல் தே.மு.தி.க. வேட்பாளர் ஜாகீர்உசேனும் காலையிலேயே பிரகதாம் பாள் பள்ளியில் உள்ள வாக்குச்சாவடி மையத்தில் ஓட்டு போட்டார்.
அனைத்து வாக்குச்சாவடிகளிலும் ஓட்டுப்பதிவு வீடியோவில் பதிவு செய்யப் பட்டது. வாக்குப்பதிவு நடவடிக்கைகளை சென்னை தலைமை செயலகத்தில் உள்ள தமிழக தலைமை தேர்தல் அதிகாரியின் அலுவலகத்தில் இருந்து கண்காணிக்கவும் ஏற்பாடுகள் செய்யப்பட்டுள்ளன.அத்துடன் செல்போன் எஸ்.எம்.எஸ். மூலம் ஒரு மணி நேரத்திற்கு ஒரு முறை வாக்குப்பதிவு நிலவரத்தை தெரிவிக்கவும் வாக்குச்சாவடி அதிகாரிகளுக்கு தேர்தல் ஆணையம் உத்தரவு பிறப்பித்துள்ளது.
இடைத்தேர்தல் பாதுகாப்பு பணியில் எல்லை பாதுகாப்பு படையினர் 550 பேர், 452 ஊர்க்காவல் படையினர், உள்ளூர் போலீசார் 1,489 பேர், தமிழ்நாடு சிறப்பு காவல் படையினர் 330 பேர் என மொத்தம் 2 ஆயிரத்து 821 பேர் ஈடுபடுத்தப்பட்டு உள்ளனர்.
இவர்கள் தங்களுக்கு ஒதுக்கப்பட்ட சாவடிகளில் நேற்று முதலே பாதுகாப்பு பணியில் ஈடுபட்டு வருகிறார்கள். திருச்சி மண்டல ஐ.ஜி. அலெக்சாண்டர் மோகன் மேற்பார்வையில் டி.ஐ.ஜி. அமல்ராஜ், மாவட்ட போலீஸ் சூப்பிரண்டு சுதாகர் ஆகியோர் தலைமையில் 3 அடுக்கு பாதுகாப்பு போடப் பட்டுள்ளது.
கலவரத்தை தூண்டினால் துப்பாக்கி சூடு நடத்தவும் தேர்தல் ஆணையம் உத்தரவு பிறப்பித்துள்ளது. வாக்குப்பதிவு முடிந்ததும் மின்னணு ஓட்டுப்பதிவு எந்திரங்கள் பலத்த பாதுகாப்புடன் வாக்கு எண்ணும் மையமான புதுக்கோட்டை அரசு மகளிர் கல்லூரிக்கு எடுத்து செல்லப்பட்டு பூட்டி `சீல்' வைக்கப்படும்.
வருகிற 15-ந்தேதி காலை வாக்குகள் எண்ணப்பட்டு முடிவுகள் அறிவிக்கப்படும்.
புதுக்கோட்டை இடைத் தேர்தலில் முதன்முறையாக வாக்களிக்க வந்தவர்களின் விரலை துடைத்த பின்னரே அடையாள `மை' வைக்கப் பட்டது. இதன்மூலம் ஆசிட், எண்ணை தடவிக்கொண்டு வந்து அடையாள மையை அளிக்கும் மோசடி செயல்கள் தடுக்கப்பட்டன
No comments:
Post a Comment