நார்வே தமிழ்த் திரைப்பட விழா 2011

"நார்வே தமிழ்த் திரைப்பட விழா 2011' வருகின்ற ஏப்ரல் 20-ம் தேதி நார்வே தலைநகர் ஆஸ்லோவில் துவங்கி, 25-ம் தேதி வரை நடக்கிறது.

இந்த விழாவில் வசந்தபாலன் இயக்கிய "அங்காடித் தெரு' படம் உள்பட 15 தமிழ்த் திரைப்படங்கள் திரையிட தேர்வாகியிருக்கிறது. 22 வகையான பிரிவுகளில் இந்தப் படங்கள் திரையிடப்பட உள்ளன. குறிப்பிட்ட பிரிவில் பார்வையாளர்களின் அதிக வாக்குகளைப் பெற்ற படம், அந்த பிரிவின் சிறந்த படமாகத் தேர்வு செய்யப்படும்.

இதற்காக மிகச் சிறந்த, சர்வதேச ரீதியிலான, வெளிப்படையான தேர்வு முறையை நார்வே தமிழ்த் திரைப்பட விழாக் குழு கடைப்பிடிக்க உள்ளது.

இந்த விழாவை ஏற்பாடு செய்திருப்பவர் வசீகரன் சிவலிங்கம். நார்வே தமிழரான இவரது "வி.என்.மியூசிக் ட்ரீம்ஸ்' என்ற நிறுவனத்தின் ஆதரவுடன்தான் இந்த விழா நடக்கிறது. இவருடன் மேலும் நார்வேயின் அபிராமி நிறுவனமும் இந்த விழாவை நடத்துவதில் கைகோர்த்துள்ளது.

இது குறித்து வசீகரன் சிவலிங்கம் கூறுகையில், ""தமிழ்த் திரையுலகம் ஒவ்வொரு வருடமும் புதிய சாதனைகளைப் படைத்து முன்னேறி வருகிறது. ஒரு வருடத்திற்கு நூறு படங்கள் வெளிவரும் நிலையிலிருந்து முன்னேறி, 2010-ல் 149 திரைப்படங்கள் வெளியாகியுள்ளன. தமிழர்கள் மட்டுமல்லாமல் மற்ற மொழிக்காரர்களும் ஆர்வத்துடன் தமிழ் படங்களை பார்க்கத் துவங்கியுள்ளனர்.

அதனால்தான் சர்வதேச திரைப்பட விழாக்களில் முன் எப்போதும் இல்லாத அளவுக்கு அதிக தமிழ்ப் படங்கள் திரையிடப்படுகின்றன. ஈரான் நாட்டு திரைப்படங்களுக்கு நிகராகவும், ஆங்கிலத் திரைப்படங்களின் தொழில் நுட்பத்துக்கு நிகராகவும் தமிழ் சினிமா வளர்ந்துள்ளது.

இப்படியான ஒரு சூழலில் தரமான கதைகள் கொண்ட தமிழ்ப் படங்களை உலகத் திரையரங்குகளில் திரையிடுவதற்கான முன் முயற்சியாகவும், தமிழ்ப் படங்களை வேறு நாட்டு இனத்தவர்கள் பார்த்து மகிழ உதவும் வகையிலும், நார்வேயில் தொடர்ச்சியாக தமிழ்த் திரைப்பட விழா நடக்கிறது. உலகத்தில் எத்தனை திரைப்பட விழாக்கள் நடைபெற்றாலும், தமிழர்களால் நடத்தப்படும், "தமிழர் விருது' என்ற சிறப்பான விருதினைத் தரும் விழாவாக இது மாறும் என நம்புகிறேன்.

இந்த விழாவின் நிறைவு நாளன்று பார்வையாளர்கள் தேர்வு செய்கின்ற திரைப்படங்களுக்கு "தமிழர் விருது' வழங்கப்படும்'' என்றார்.

இந்த விழாவில் "எந்திரன்', "அங்காடித் தெரு', "களவாணி', "மதராசப்பட்டினம்', "ஆடுகளம்', "மைனா', "பாஸ் என்கிற பாஸ்கரன்', "விண்ணைத் தாண்டி வருவாயா', "யுத்தம் செய்', "தா', "பயணம்', "தென்மேற்கு பருவக்காற்று', "என் சுவாசம்' ஆகிய படங்கள் திரையிட தேர்வாகியுள்ளது.

மேலும் எம்.ஜி.ஆர்.நடித்த, "எங்க வீட்டுப்பிள்ளை', சிவாஜி கணேசன் நடித்த "கப்பலோட்டிய தமிழன்' ஆகிய படங்களும் திரையிடப்படுகிறது. அத்துடன் "செங்கடல்', "எல்லாளன்' ஆகிய திரைப்படங்களும் சிறப்புப் பிரிவில் இடம் பெறுகிறது.

நார்வே திரைப்பட விழாவின் சிறப்பு அம்சமாக 10 குறும்படங்களை தேர்வு செய்து திரையிட உள்ளனர். அந்த 10 படங்களை இயக்குநர் சேரன் தேர்வு செய்கிறார். இதில் தமிழர் வாழ்வியல் சார்ந்த படங்களுக்கு முதல் இடம். இதற்காக தங்கள் குறும் படங்களை அனுப்ப விருப்பமுள்ளோர் இந்த மாதம் (மார்ச்) 25-ம் தேதிக்குள் சி.டி.,டிஜி பீட்டா, ஹார்ட் டிஸ்க் வடிவில் அனுப்பி வைக்கலாம், என்கின்றனர்.