பிரணாப் முகர்ஜி சென்னை வருகிறார் என பரபரப்பு?

காங்கிரசுக்கும் தி.மு.க.வுக்கும் தொகுதி பங்கீடு பிரச்சினையால் ஏற்பட்ட பின்னடைவைத் தொடர்ந்து ஐக்கிய முற்போக்கு கூட்டணி அரசில் இருந்து விலகுவதாக தி.மு.க. அறிவித்தது.

இதுகுறித்து டெல்லியில் செய்தியாளர்களிடம் பேசிய காங்கிரஸ் செய்தித் தொடர்பாளர் அபிஷேக் சிங்வி, தற்போதை சூழலில் கருத்து எதுவும் கூற விரும்பவில்லை. பேச்சுவார்த்தை நடந்துகொண்டிருக்கும்போது இந்த சம்பவம் நடந்துவிட்டது. தொடர்ந்து பேச்சுவார்த்தை நடத்தி வருகிறோம். தொகுதி எண்ணிக்கையில் பிரச்சனை இல்லை. பேச்சுவார்த்தைக்குப் பின் காங்கிரசுக்கு தேவையான தொகுதிகளை கேட்டுப் பெறுவோம் என்றார்.

திமுக முடிவு குறித்து குலாம் நபி ஆசாத் கூறுகையில், திமுகவுடன் உறவு முறியவில்லை. ஏனென்றால் பேச்சுவார்த்தை தொடர்கிறது. தொகுதிகளை இனம் காண அவகாசம் தேவை. பின்னர் நடைபெறும் பேச்சுவார்த்தையில் தேவையான தொகுதிகளை கேட்டுப் பெறுவோம் என்றார்.

திமுக தனது முடிவை அறிவிக்கும் முன்பு திமுக காங்கிரஸ் கூட்டணி தொடரும் என்றும், இரு கட்சிகளும் பேச்சுவார்த்தை நடத்தி தொகுதி பங்கீடு குறித்து தீர்வு காணும் என்றும் பிரணாப் முகர்ஜி கூறியிருந்தார். திமுக தனது முடிவை அறிவித்த பின்னர், பிரணாப் முகர்ஜி சென்னை வருவார் என அரசியல் வட்டாரத்தில் செய்திகள் வெளியாகி உள்ளன.