வடிவேலு உங்களை தாக்கி பேசியிருக்கிறாரே? விஜயகாந்த் பதில்

தேமுதிக தலைவர் விஜயகாந்த் ரிஷிவந்தியம் தொகுதியில் போட்டியிடுகிறார். இதற்காக அவர் 24.03.2011 அன்று வேட்புமனுத் தாக்கல் செய்தார். வேட்புமனு தாக்கல் செய்த பிறகு செய்தியாளர்களின் கேள்விகளுக்கு விஜயகாந்த் பதில் அளித்தார்.

கேள்வி:  வெற்றி வாய்ப்பு எப்படி இருக்கிறது?

பதில்:  சூப்பராக இருக்கிறது. எனக்கு எந்த பயமும் இல்லை.

கேள்வி: அ.தி.மு.க., கூட்டணி வெற்றி வாய்ப்பு எப்படி உள்ளது?

பதில்: பிரகாசமாக உள்ளது. எங்கள் கூட்டணி வெற்றி கூட்டணி; அதிக இடங்களில் வெற்றி பெறுவோம். தேர்தலை பார்த்து எங்களுக்கு பயமில்லை.

கேள்வி:  பிரசாரம் எதை முன்நிறுத்தி இருக்கும்?

பதில்:  ஒரு போர் என்றால் பாகிஸ்தானுடன் இந்தியா போரிடும்போது வெற்றிக்காக தேவைக்கேற்ப வியூகங்கள் இருக்கும். அதுபோன்று தான் இந்த தேர்தலிலும் இருக்கும்.

கேள்வி:  உங்களின் பிரசார வியூகம் எப்படி இருக்கும்?

பதில்:  பிரசாரத்தின் போது தான் தெரியும்.

கேள்வி:  ஜெயலலிதாவுடன் இணைந்து ஒரே மேடையில் கூட்டு பிரசாரம் மேற்கொள்வீர்களா?

பதில்:  இப்போது எப்படி சொல்ல முடியும். நான் என்ன ஜோசியம் படித்திருக்கிறேனா? கணித்து சொல்வதற்கு. அது அந்தந்த நேரத்தில் நடக்கும். பிரசாரம் இணைந்தோ, இல்லையோ அதை பார்க்காதீர்கள். வெற்றியை மட்டும் பாருங்கள். எங்கள் கூட்டணி வெற்றி கூட்டணி. நிச்சயம் வெற்றி பெறுவோம்.

கேள்வி: ரிஷிவந்தியத்தை ஏன் தேர்வு செய்தீர்கள்?

பதில்: தமிழகத்தில் உள்ள அனைத்து சட்டசபை தொகுதிகளுக்கும் போக விருப்பம். எல்லா தொகுதிகளிலும் பாதிக்கப்பட்ட மக்கள் உள்ளனர். அவர்களுக்காக முதலில் பணியாற்ற தற்போது ரிஷிவந்தியத்தை தேர்வு செய்துள்ளேன். தொடர்ந்து பல இடங்களில் போட்டியிட்டு பணியாற்றுவேன்.

கேள்வி: வடிவேலு உங்களை பற்றி தனிப்பட்ட முறையில் தாக்கி பேசியிருக்கிறாரே?

பதில்:  அதற்கெல்லாம் பதில் சொல்ல வேண்டியதில்லை. என்னை பற்றி மக்களுக்கு தெரியும் என்றார்.