மத்திய அரசியல் இருந்து விலகுவதாக திமுக அறிவிப்பு

மத்திய அரசில் இருந்து திமுக விலகுகிறது என்றும், மத்திய அரசுக்கு பிரச்சனை அடிப்படையில் இனி ஆதரவு அளிக்கும் என்றும் திமுக உயர்நிலை செயல்திட்டக் குழு கூட்டத்தில் முடிவு எடுக்கப்பட்டது.

பரபரப்பான அரசியல் சூழ்நிலையில் திமுக உயர்நிலை செயல்திட்டக் குழு கூட்டம் திமுக தலைவர் கருணாநிதி தலைமையில் சனிக்கிழமை மாலை சென்னையில் கூடியது.

தமிழக சட்டமன்ற தேர்தல் தொடர்பாக ஏற்கனவே திமுக காங்கிரஸ் கட்சிகளுக்கிடையே பேச்சுவார்த்தை நடைபெற்றுள்ளது. காங்கிரஸ் கட்சியின் கோரிக்கையை ஏற்று 60 தொகுதிகளை ஒதுக்க திமுக முன்வந்தது. இருப்பினும் காங்கிரஸ் கட்சி கூடுதல் தொகுதிகளை கேட்பதுடன் சில நிபந்தனைகளையும் விதித்திருந்தது.

இதுகுறித்து முதலமைச்சர் கருணாநிதி வெள்ளிக்கிழமை வெளியிட்ட அறிக்கையில், காங்கிரஸ் கட்சி 60 தொகுதிகள் போதாது என்று 63 தொகுதிகள் கேட்பதும், அதுவும் எந்தெந்த தொகுதிகள் என தாங்கள் கேட்பதை கொடுக்க வேண்டும் என்பது முறைதானா என்று கேள்வி எழுப்பியிருந்தார்.

இதுதொடர்பாக சனிக்கிழமை மாலை கூடும் திமுக உயர்நிலை செயல்திட்டக் குழு கூட்டத்தில் விவாதித்து உரிய முடிவு எடுக்கப்படும் என்றும் தெரிவித்திருந்தார். அதன்படி சனிக்கிழமை மாலை திமுக உயர்நிலை செயல்திட்டக் குழு கூட்டம் கூடியது.

முன்னதாக நிதியமைச்சர் க.அன்பழகன், துணை முதல்வர் மு.க.ஸ்டாலின், மத்திய அமைச்சர்கள் மு.க.அழகிரி, தயாநிதி மாறன், திமுக தொகுதி பங்கீட்டு குழுவினர் பொன்முடி, துரைமுருகன், ஆர்க்காடு வீராசாமி, பொன்முடி, டி.ஆர்.பாலு ஆகியோருடன் முதல்வர் கருணாநிதி ஆலோசனை நடத்தினார். மாலையில் நடக்க உள்ள திமுக உயர்நிலை செயல்திட்டக் குழு கூட்டத்தில் எடுக்கவுள்ள முக்கிய முடிவுகள் குறித்து ஆலோசனை நடத்தினார்.

அதனைத் தொடர்ந்து சனிக்கிழமை மாலை திமுக உயர்நிலை செயல்திட்டக் குழுகூட்டத்தில் நிர்வாகிகளின் கருத்துக்களை திமுக தலைவர் கருணாநிதி கேட்டார்.

பின்னர், மத்திய அரசில் இருந்து திமுக விலகுகிறது என்றும், மத்திய அரசுக்கு பிரச்சனை அடிப்படையில் இனி ஆதரவு அளிக்கும் என்றும் திமுக உயர்நிலை செயல்திட்டக் குழு கூட்டத்தில் முடிவு எடுக்கப்பட்டது.


..