எம்.ஜி.ஆர் முதல் பேரன் வரை...!

பிரபல திரைப்பட இயக்குநர் பி.வாசுவின் தந்தை எம். பீதாம்பரம் காலமாகிவிட்டார். எம்.ஜி.ஆரின் மேக்கப் மேனாக பல படங்களில் பணிபுரிந்தவர் பீதாம்பரம். இவரது 83வது வயதில் இயற்கை அன்னையிடம் அடைக்கலமாகிவிட்டார்.

கேரளாவைச் சேர்ந்த பீதாம்பரம், வாஹினி ஸ்டூடியோவில் உதவி மேக்கப் மேனாக தனது வாழ்க்கையைத் தொடங்கினார். ஒருகட்டத்தில் பிரபல தெலுங்கு நடிகர் என்.டி.ராமாராவுக்கு மேக்கப் போடும் வாய்ப்பு கிடைத்தது. ராமாராவ் கிருஷ்ணர் வேடத்தில்தான் புகழடைந்தார். அந்த மேக்கப்பை அவருக்குப் போட்டுவிட்டது பீதாம்பரம்தான்.

அந்த அளவிற்குப் புகழ்க்கொடி நாட்டியவர். என்.டி.ஆர். மட்டுமின்றி ஹிந்தி நடிகர் அசோக்குமார், ஜெமினி கணேசன் ஆகியோருக்கும் மேக்கப் போட்ட பெருமையுடையவர். ஆனால் எம்.ஜி.ஆரை சந்தித்த பின் அவரது நிரந்தர மேக்கப் மேனாகவே ஆகிவிட்டார்.

"முரட்டுக்காளை' படத்தில் ரஜினி, கிருஷ்ணர் வேடத்தில் வருவது போன்று ஒரு காட்சி அமைக்கப்பட்டது. அந்தக் காட்சிக்காக பீதாம்பரத்தை அழைத்து ரஜினிக்கு கிருஷ்ணர் வேடம் போட வைத்தனர். பல வெற்றி முகங்களுக்கு மேக்கப் போட்ட பீதாம்பரம், தனது பேரனும், இயக்குநர் பி.வாசுவின் மகனுமான ஷக்திக்கும் மேக்கப் போட்டு அழகு பார்த்தார் என்பதுதான் ஹைலைட்.

பீதாம்பரத்தின் மூத்த மகன் வித்யாசாகர். தமிழ் சினிமாவின் குறிப்பிடத் தக்க விநியோகஸ்தர். சக்கைபோடு போட்ட "சந்திரமுகி' படத்தை விநியோகித்தவர் இவர்தான். பல வெற்றிப் படங்களைக் கொடுத்த பி.வாசு, பீதாம்பரத்தின் இரண்டாவது மகன். தன்னுடைய இரண்டு மகன்களையும் திரைத்துறையில் புகழ் பெற வைத்து சந்தோஷமடைந்த பீதாம்பரம் உடல் நிலை பாதிக்கப்பட்டு இயற்கை எய்தினார்.

கிருஷ்ணர் மேக்கப்பிற்கு புகழ் பெற்ற பீதாம்பரத்தை விண்ணுலகில் அந்த கிருஷ்ணரே ஆசிர்வதிப்பார் என்பதில் சந்தேகமில்லை.