நடிகையின் பேச்சு தடுமாறிய கட்சி

பெண்கள் ஒரு நாளைக்கு ஒரு சிகரெட் குடித்தால் தப்பில்லை. இதனால் அவர்கள் உடலில் வெயிட் போடுவது குறையும் என்று கூறி கடைக்காரர்களின் வயிற்றில் புகை வார்த்தார் சனாகான். என்னது? பொம்பளைங்க சிகரெட் குடிச்சா தப்பில்லையாமா? என்று ஆவேசத்தோடு கிளம்பியது வேறொரு வட்டாரம்.

அந்த வட்டாரம் எது என்று இந்நேரம் யூகித்திருப்பீர்களே, யெஸ்... இந்து மக்கள் கட்சியினர்தான். நடுநிசி நாய்கள் பட இயக்குனர் கவுதம் வீட்டுக்கு நாலைந்து நாய்களையும் பிடித்துக் கொண்டு போய் ஆர்ப்பாட்டம் செய்த இவர்கள், அடுத்த பிரச்சனைக்காக ஏங்கிக் கொண்டிருக்கும் போதுதான் சனகான் அவர்களை உசுப்பேற்றிவிட்டார்.

இப்படி பேசிய அவரை கண்டிக்கும் விதத்தில் அவரது வீட்டுக்கு கட்டு கட்டாக சிகரெட் அனுப்பும் போராட்டம் நடக்கும் என்று எச்சரித்திருக்கிறார்கள். இப்படி ஆவேசத்தில் எச்சரித்தாலும், மும்பை நடிகைகளின் வீட்டை எங்கு போய் தேடுவது? துட்டு இருக்கிற நடிகைக்குதான் சொந்த வீடு. இல்லாத நடிகைக்கு ஹோட்டல்தான் வீடு. அதுவும் ஒரு நாளைக்கு ஒன்று என்று மாறிக் கொண்டேயல்லவா இருப்பார்கள்? எந்த அட்ரசுக்கு அனுப்புவது என்ற குழப்பம் வந்துவிட்டதாம் அவர்களுக்கு.

பேசாமல் நடிகர் சங்கத்திற்கு அனுப்பிவிடலாமா என்று யோசித்துக் கொண்டிருக்கிறார்களாம். ஆனால் அங்கு சனாகான் உறுப்பினராகி விட்டாரா என்பதே சந்தேகமாக இருக்கிறதே!