என்றாவது சாதிப்பேன்! பாவனா நம்பிக்கை!

தமிழ் சினிமாவில் என்றாவது சாதிப்பேன் என்று நடிகை பாவனா நம்பிக்கை தெரிவித்துள்ளார். அசல் படத்திற்கு பிறகு புதிய பட வாய்ப்புகள் இல்லாமல் மலையாள சினிமா பக்கம் ஒதுங்கியவர் நடிகை பாவனா. இப்போது ப்ரியதர்ஷன் இயக்கத்தில் உருவாகப் போகும் புதிய படமொன்றில் நடிக்க ஒப்பந்தமாகியிருக்கிறார். நல்ல நடிகை என்று பெயரெடுத்தும், தமிழ் சினிமாவில் முன்னணி இடத்துக்கு வர முடியாது ஏன்? என்று பாவனாவிடம் கேட்டால், நம்பிக்கை தெறிக்க பேசுகிறார். அவர் தனது பேட்டியில், அசல் படத்துக்குப் பின் தமிழில் எந்த வாய்ப்புகளும் வரவில்லை. தமிழ் சினிமா இயக்குநர்கள் மீது எனக்கு எந்த கோபமும், புகாரும் கிடையாது. நிறைய இயக்குநர்கள் பேசியிருக்கிறார்கள். ஆனால் அவர்களிடம் நடிப்பது குறித்து நான் எதுவும் பேசவில்லை. சிலர் கதைகளும் சொல்லியிருக்கிறார்கள். தமிழ் சினிமாவில் என்றாவது சாதிப்பேன். அந்த நாள் வெகு தூரத்தில் இல்லை. ஆரம்பத்தில் கன்னடம் மற்றும் மலையாளப் படங்களில் நடிப்பது குறித்து யோசிக்கவில்லை. கன்னட மொழி எனக்கு தெரியாத பிரச்னையும் இருந்தது. புனித் ஜோடியாக நடிக்க "ஜாக்கி பட வாய்ப்பை இழக்க விரும்பாமல் ஏற்றுக் கொண்டேன். ரசிகர்கள் பெரும் வரவேற்பு தந்து படத்தை வெற்றிப் படமாக மாற்றி விட்டார்கள். மலையாளத்தில் 2010ல் மூன்று படங்களில் நடித்து விட்டேன். அடுத்து பிரியதர்ஷன் இயக்கத்தில் நடிக்கிறேன். கல்லூரி வளாகத்துக்குள் நடக்கும் கதை, என்று கூறியுள்ளார்.