பிள்ளையை இயக்கும் அப்பா!

"பாசக்கார நண்பர்கள்" இது "தம்பி அர்ஜூனா" பட நாயகர்களில் ஒருவராக நடித்த பெரோஸ்கான், கதை, திரைக்கதை, வசனம் எழுதி இயக்கி, தயாரிக்கவும் செய்யும் புதிய படத்திற்கான நாமகரணம்!

ஏஞ்சல் பிலிம் இண்டர்நேஷனல் தயாரிப்பில் பெரோஸ்கான் இயக்கத்தில் அவரது 15வயதே நிரம்பிய மகன் அஜ்மல் கான் நாயகராக நடிக்கும் பாசக்கார நண்பர்கள் படத்தின் கதைப்படி அஜ்மல் பள்ளி பருவத்திலேயே உலகப்புகழ் பெற்ற குத்துச்சண்டை வீரராக வரவேண்டும் என்ற வைராக்கியத்துடன் வளைய வருபவராம். அவரது லட்சியம் நிறைவேற முடியாத அளவுக்கு பல்வேறு தடைகள் ஏற்படுகின்றன. அவற்றை எப்படி எதிர்கொண்டு உலக அளவில் நடக்கும் ஜூனியர் குத்துச்சண்டை போட்டியில் ஹீரோவாக ஜெயிக்கிறார் என்பதே இப்படத்தின் கதைக்களம் எல்லாமும்!

காதல் இல்லாத இப்படத்தில் அஜ்மல்கானுடன் அவரது அப்பா பெரோஸ்கானும் முக்கியபாத்திரத்தில் நடிக்கும் இப்படத்தில் வெண்ணிறஆடை மூர்த்தி, பாலாசிங், எலிசபெத், ரவிச்சந்திரன், கொட்டாச்சி, "பாய்ஸ்" ராஜன், மைக் முத்துராஜ், மேஷாக், மோனி, ரிஷிராஜ், கிருஷ்ணா என ஒரு பட்டாளமே நடிக்கிறது. தினாவின் இசையும், மோகனராமனின் ஒளிப்பதிவும், எஸ்.பி.அகமதுவின் படத்தொகுப்பும் "பாசக்கார நண்பர்கள்" படத்திற்கு பலம் சேர்த்து வருகின்றன. அப்புறம் என்ன அப்பாவின் இயக்கத்தில் பையனை பார்க்க வேண்டியதுதான் பாக்கி!