காதலை அழித்தால்...

எஃப்.சி.எஸ். கிரியேஷன்ஸ் சார்பில் துவார் ஜி.சந்திரசேகர் தயாரித்து வழங்கும் "கொஞ்சம் வெயில் கொஞ்சம் மழை" திரைப்படம் முழுதாக தயாராகிவிட்டதாம். உலககோப்பை கிரிக்கெட், பரீட்சை, தேர்தல் போன்ற சீஸன்கள் முடிந்ததும் மே மாதம் மூன்றாம் வாரத்தில் திரைக்கு வர இருக்கும் இப்படத்தை பாடலாசிரியர் ஏகாதசி முதன்முதலாக இயக்கி இருக்கிறார் என்பது தெரிந்திருக்கலாம்!

படம் பற்றி ஏகாதசியிடம் கேட்டால், "கொஞ்சம் வெயில் கொஞ்சம் மழை" படத்தின் படப்பிடிப்பு துவங்கி முடிந்த 50-நாட்களும் படத்தின் தலைப்பிற்கு ஏற்ப வெயிலும், மழையும் மாறி மாறி அடித்தன. நாங்கள் எதற்கும் அஞ்சாமல் அந்தந்த சூழலுக்கேற்ப படப்பிடிப்பை விடாது நடத்தி முடித்துள்ளோம். ஒரே ஒரு ஷாட்டுக்காக நாயகனையும், நாயகியையும் மூன்று கிலோ மீட்டர் தூரம் மலையில் நடக்க வைத்தற்காக இயக்குநர் மீதும், காமிரமேன் மீதும் கோபம் கொண்ட படக்குழுவினர், படம் முடிந்ததும் இன்று அந்த ஒரு ஷாட் பாடல்காட்சியில் தரும் பிரமாண்டத்தைப் பார்த்து அசந்து போய் உள்ளனர்.